|
 |
 |
 |
|
رقم المشاركة : ( 1 )
22 - 01 - 2017, 10:32 AM
|
|||||||||||
|
|||||||||||
|
الشبّورة علّمت علينا!.. قصة ضعفنا قصة مسلية وواضحة زي الشمس مش محتاجة نظرة عميقة و لا حوار طويل عشان نلاقيها في كل اللي حوالينا! مش حاتكلم عن الصحة والمرض، و لا عن الحالة الذهنية او النفسية و لا تقسيم الأرزاق و الأحداث اللي كلها بتدل على الضعف ده.. في مثال اسهل واضح لكل المخلوقات في حالة الجو.. بص كده على الناس في البلاد الحر أو فصول الحر؛ شمس حارقة و حرارة عالية.. أي حد عاقل حيلبس لبس خفيف و حيشرب ميه كتير و يحاول يقعد في مكيف أو قدام مروحة و على الاقل في الضل، اللي يقدر يسافر بعض الوقت لحتة فيها بحر أو هوا و درجة حرارة معتدلة بيعمل كدة.. ييجي بقى الشتا الجميل  لبس تقيل، بطاطين، دفايات او نار، مشروبات سخنة مناطق ادفا بوستات اكتر عالفيس بوك و محاولات للاحتماء من المطر و البرد قد ما نقدر ... كل اللي بتقدر تعمله العلوم و التجارب انها بتحسن استجابتنا للحالات المختلفة دي و بتزود ادواتنا للتعامل معاها "مؤقتا" .. لكن بتعجز عن تغيير الحالة نفسها.. ناهيك بقى عن عواصف او أمطار جامدة أو شبورة كثيفة مع انعدام للرؤية .. الحاجات اللي بتسبب شلل تام و مالهاش حل حتى في العلم و الأدوات (زي مثلاً أنوار الشبورة في العربيات اللي ممكن نبلها و نشرب ميتها) تخيل كده ايه اللي حيحصل لو ربنا قدر للشبورة دي تستمر كام يوم؟! .. الدروس المستفاده من النظر للجو كتير: اولا: احنا اضعف بكتير مما احنا متصورين.. مهما وصلنا من القوة في العلم و الابداع بيفضل اعتمادنا في اساسيات حياتنا كله على ربنا و مانقدرش نقاوم الاستجابه للحقيقة دي ولا نرفضها! ثانيا: لما بنضطر نتعامل مع أي حاجة بنلاقي طرق للتعامل معاها.. لكن مع وجود الطرق و توافرها ربنا دايما بيفكرنا اننا برضه محتاجينه عشان الأدوات و الاسباب دي تشتغل و تنجح ثالثا: بعيد عن الجو حتلاقي نفس القوانين في حياتنا اليومية؛ لما بنعتقد ان النجاح بييجي باعتمادنا على دماغنا و افكارنا و ادواتنا، الاعتقاد ده عادةً بيثبت فشله مع الوقت (بص حواليك حتلاقي الأدله) و ده بيثبت كمان قصور عقلنا في التفكير و قصور قلوبنا في التدبر في دروس مش محتاجة ذكاء و واضحة رابعاً: و هنا تبدأ الأخبار الجميلة و المريحة .. احنا مش متحكمين في الكون، كل اللي احنا نقدر نتحكم فيه هو ازاي نستجيب لأحداث اتخلقت و اتقدَرت بحكمة و عدل و ميزان لا يختل و ما نقدرش حتى نستوعب الحكمة دي كلها بدماغنا مهما بلغنا من الذكاء و العلم .. فعشان كدة من الحكمة اننا نرتاح و نتقبل و نفتح قلوبنا للايمان و نرمي من على ضهرنا أحمال التوكل على النفس و الاعتقاد الأهبل في قوتنا المطلقة .. ببساطة نبطل نحمّل نفسنا هم تحقيق النتايج لأنها مش بإيدينا! خامساً: في كل الأحوال خد المواضيع ببساطة و متعقدهاش عشان انت مش قد الوصول لآخرها .. آخرها مش بتاعك يا برنس .. الوسيلة الوحيدة للقوة الحقيقية تبدأ من الاعتراف بضعفنا.. بفخر و عزة و تقبّل سادساً: اعمل اللي عليك و تقبل النتايج و ارتاح دلوقتي و اتبسط دلوقتي و ابني المهم دلوقتي قبل ما الوقت يجري و احنا شاغلين وقتنا كلة في تظبيط الديكور و ناسيين نبني الاساسات اللي حنحتاجها وقت ما الديكور حيطير مع شوية هوا او يستخبى ورا شوية شبّورة 
|
|
العرض الشجري