الوقت منذ الآن مقصر

[walaa farouk]

لما بنشوف الصورة دي بنعرف على طول ان السماء هتمطر..

بالظبط نفس الحكاية السيد المسيح قالنا في الكتاب المقدس ان فيه علامات هتبين انه قرب يجي زي ما مكتوب في انجيل متى اصحاح 24 .. هيبقى فيه ازمنة ضيق ومجاعات وحروب واخبار حروب واعتقد ان كلنا حاسين بالحاجات دي بتحصل دلوقتي، صحيح انها برضه كانت بتحصل زمان وطول الوقت فيه ازمات وحروب بس الوقت اللي احنا فيه ده مش زي اي وقت فات، ناس كتير بقت حاسة انه خلاص الدنيا قربت تخلص ..

طب تفتكروا ليه الرب يسوع حذرنا كده في الكتاب المقدس؟ في ايه كل لما بقراها بتبهرني كان الرب يسوع دايمًا بيقولها " وَقُلْتُ لَكُمُ الآنَ قَبْلَ أَنْ يَكُونَ، حَتَّى مَتَى كَانَ تُؤْمِنُونَ." الرب يسوع قالنا الحاجات دي علشان نؤمن بيه ويكون ده تشجيع لينا وايمان اكتر ان الكلام اللي قاله ده حقيقي وكمان علشان نحذر الناس ونرشدهم للطريق الصح.. مش علشان نفضل كده قاعدين ساكتين وملهيين في حياتنا.. احنا علينا مسئولية لو فعلا عايشين ليسوع زي ما بنقول وولاده بجد، أولاً .. لازم نكون متأكدين اننا سلمنا حياتنا ليه واحنا معاه ف الأبدية ومستعدين انه يجي في أي وقت، وثانيًا .. نكلم الناس اللي بنحبهم ونعرفهم سواء قرايبنا أو جيرانا أو أولادنا أو أهلنا عنه .. كفاية نوم لحد كده .. " الْوَقْتُ مُنْذُ الآنَ مُقَصَّرٌ" .. هتعمل ايه قدام رسالة ربنا دي؟