عندي خبر لازم تعرفوه حالا
و محدش يزعل مني اصل دي الحقيقة ..
انتوا مش بتحبوا ولادكم..وهما عارفين كويس انكم مش بتحبوهم..!
كنا في اجازة الصيف، و قررت اعمل للولاد انشطة عن تنمية المهارات
المهم درس النهاردة كان عن ازاي الواحد يحول الافكار السلبية الى ايجابية
ازاي اما يفكر في حاجة تزعله يبصلها بطريقة مختلفة عشان تفرحه
فاديتهم مثال بسيط عن ولد مامته زعقتله عشان عمل حاجة خطر، ففكر ان مامته مش بتحبه
بعدين طلبت من الولاد انهم يشاركوني ان كان حد حس بالاحساس ده قبل كده
و هنا كانت الصدمة..
كلهم تقريبا قالولي ان امهاتهم فعلا مش بيحبوهم
و انهم اما بيزعقولهم بيحسوا انهم بيكرهوهم
طيب نعمل ايه يا ولاد اما تجبلنا الفكرة دي؟
هدوء تام سيطر على المكان. .
ايه رأيكم اول ما تجيلنا الفكرة دي نبدلها بفكرة "ماما بتحبني و عملت كده عشان خايفة عليا"
بدأوا يركزوا معايا تاني بعد ما كان كل واحد سرح في خياله و قعد يسترجع الماضي
زي ما تكون اهم عقبة و قلق في حياتهم انزاحت خلاص
عمري ما فكرت قبل كده ان احتمال ميكونش اهلي بيحبوني
لكن دول اطفال كبيرتهم في خامسة ابتدائي
لكن اقول ايه الجيل اختلف في زمن بقى الحب فيه رخيص و مبتزل
و التعبير عن الحب بقى اصعب حاجة لأغلب الناس
سهل اننا نضحي و نحرم نفسنا من حاجات عشان خاطر ولادنا
لكن اننا نفكرهم بقد ايه احنا بنحبهم بقت مهمة محرجة وتقيلة على القلب
طيب تقدر تجاوب على الكام سؤال دول
ليه بنلاقي اهالي بيصرفوا كل اللي حليتهم على ولادهم و مع كده اول ما الولاد يكبروا يبقوا عاقين ليهم و ميسألوش عنهم؟
طب ليه في اطفال بيسرقوا من ابائهم اللي عمرهم ما اتأخروا عنهم في تلبية طلباتهم؟
طب ليه البنت اول ما بتكبر بتتشعبط في اول واحد يغازلها بكلمات الحب؟
ليه بترخص نفسها و بتعمل اللي عمرها ما اتربت عليه في سبيل الحب الزائف ده؟
قولي استنتجت ايه..؟
في غياب الحب بتحصل الصدمات و في وجوده بتصنع المعجزات❤
انا مقولتش ان من النهاردة مش هتأدب ابنك وهتقضيها بوس واحضان ومغرم وولهان
لكن اكتر وقت ابنك محتاج فيه انك تطمنه باحضان الحب هو وقت النصح والتوجيه
تخيل تأثير كلامك على ابنك و انت بتقوله
"انا بحبك و خايف عليك فمش هقدر اسمحلك انك تتأخر بره البيت لحد الساعة دي"
او اما تقولي لبنتك
"انا يهمني انك تبقي راضية عن نفسك و حاسة بالأمان في نفس الوقت. المشكلة في ان الفستان ده هيخليني فعلا قلقانة عليكي"
حط نفسك مكان الطفل..حسيت بإيه؟
حسيت بالاهتمام و التقدير و الاحترام؟
حسيت برغبة اقل في المقاومة والتمرد حتى وان مكنتش على استعداد انك تقتنع بالكلام ده على طول؟
طيب حسيت بالأمان و لا بالتهديد..
فكرت ان اللي بيوجهلك النصح عدو ولا صديق..محب ولا كاره؟!!
من اكتر الجمل اللي بتوصل لقلبي في علم التربية الايجابية هي عبارة
Let the message of love get through
او "خلي رسالة الحب توصل"
80% من متاعبنا مع ولادنا هتخف اما نستعمل الحب كوسيلة للتربية والتوجيه
الحب اللفظي اللي يتسمع و يتحس
ولو مكانش التعبير عن الحب بالكلام مهم مكانش الشعراء والفنانين تنافسوا مين يتفنن اكتر في كلمات الغزل
سيبك من اللي يقولك الحب افعال وليس اقوال
لا يا حبايبي
الحب افعال مع اقوال..الاتنين بيكملوا بعض
بلاش نبخل بكلمات الحب و التشجيع مع ولادنا حبايبنا
الحب طاقة تقدر تغير مسار الكون كله
الحب ثقة و دعم و تشجيع
الحب راحة و امان
الحب علاج
خد ابنك في حضنك دلوقتي و قوله انك بتحبه
و خليها عادة انكم تعبروا عن حبكم لبعض لسبب و بدون سبب
صدقني هتخلي حياتك مع ولادك ليها طعم تاني
و با بختك بقى لو فضلت تسمعها من ولادك وقت الفرحة و التعب و الضغوط
و يا رب تفضل تسمعها منهم لحد اخر يوم في عمرك
