|
 |
 |
 |
|
رقم المشاركة : ( 1 )
24 - 12 - 2016, 10:09 AM
|
|||||||||||
|
|||||||||||
|
عارفة إحساس اما تكوني في عيد جوازك و يخش عليكي جوزك بكيلو لحمة بدل بوكيه الورد اللي نفسك فيه؟ ولا احساس اما يجي جوزك يفسحك في عيد ميلادك فيقوم يوديكي عند مامته؟ ايه مش مبسوطة ليه يا ناكرة الجميل؟! مكشرة ليه بس؟!! ده بدل ما تقومي تشكريه على انه بيفكر فيكي و عايز يدخل السعادة على قلبك؟ اما زوجة نكدية بصحيح و مبيعحبهاش العجب ! ده بالضبط احساس الأهالي اللي هيتجننوا عشان يفرحوا ولادهم والولاد يا عيني عاملين زي المحرومين تلاقي الأب من دول مطبق في الشغل و واخد شيفتات زيادة عشان يجمع تمن المصيف والولاد حاسين بالظلم و التفرقة العنصرية وتلاقي الأم من دول رجليها ورمت من اللف على لبس العيد و طلبات المدارس و الولاد بيشتكوا بحسرة ان مامتهم مش بتفكر فيهم طيب ايه الحل،؟! ولادنا فعلا مش مقدرين المجهود اللي بنعمله عشان نفرحهم!! اكيد دلوقتي حطيتم ايدكم على المشكلة و فهمتم ان الواحد ممكن ميكونش عارف بالضبط ايه اللي بيفرح الناس في وقت معين. . ايه نوع الفسحة اللي بيحبوها؟ ايه اللعبة اللي نفسهم فيها؟ ايه النشاط اللي بيفرحه اغلب خيبات الأمل دي بتحصل بسبب خلل في التواصل.. انت عارف ايه هو الشيء المفضل بالنسبة لولادك؟ قضيت وقت معاهم تحاول تفهمهم و تلاحظ ايه اكتر الحاجات اللي بتفرحهم؟ لا يا عم انا بش بتاع الكلام ده..فكك من جو المحن ده واللي عايز حاجة يجي بقوللي عليها هو أنا ناقص تخمين؟ طيب اخدتي رأي ولادك و انت بتخططي مع جوزك على فسحة العيد ولا سفرية الساحل ولا نوع التمرين؟ اشركيهم بس في التفكير و التخطيط وخدوا منهم حل وسط. . محدش قال انهم هما اللي هيمشوا البيت من النهاردة ولا حاجة.. بس هما شركاء في الحياة اللي عايشنها معاكم و مينفعش نتجاهلهم! بس انا مش فاضية و متفرغة لولادي و هما طلباتهم مش بتخلص! مستحيل احقق السعادة و المتعة لولادي طول الوقت! كويس جدا أننا اتكلمنا في النقطة دي.. لازم تعرفي كويس انه مش مفروض خالص انك تكوني متواجدة لولادك طول الوقت عشان يبقوا مبسوطين لازم تعلميهم ازاي يبسطوا نفسهم بنفسهم لو محدش فاضي ليهم و ده فن للأسف ناس كتير بالغين ميعرفوش حاجة عنه.. وبيبقوا معتمدين على شخص معين يحققلهم السعادة و غيابه بيبقى مأساة بالنسبالهم عارفة ان الستات بالذات بيقعوا ضحية الغلطة دي كتير.. عشان كده هتعلمي ولادك ازاى يلاحظوا الحاجات اللي بتبسطهم و يعملوها هتعلميهم يعملوا الفطار لنفسهم.. و يفتحوا الفيلم اللي بيحبوه على الكمبيوتر.. و يتصلوا بأصحابهم اما يوحشوهم علميهم اننا مش عايشين في الدنيا دي لوحدنا مفيش مانع مامت زمايل ولادك تعدي عليكي و تاخد ولادك مع ولادها للنادي في يوم (وتعوضيهولها لو طلبت) او ان اطفال العمارة يتجمعوا في بيت حد منهم مرة في الاسبوع و يلعبوا سوا (تكوني ضامنة اخلاق اهل البيت طبعا) بس انا مستحيل كل اللي بعمله يكون على هوا اطفالي طول الوقت! ساعات فعلا مش بيعجبهم العجب .. زي اما احاول اقنع بنتي اني فعلا ملاقتش الفستان الغامق اللي بينور في الضلمة او اما اقنع ابني اني مش عارفة الشوز اللي بيمشي لوحده بيتباع فين و مين قال انك مفروض تعملي كل ده لازم تعلمي ولادك يكونوا ممتنين للي بتعمليه عشانهم و يقدروه.. لا لا لا استني مش هتذلي فيهم تاني ب"انا عملت كل ده عشانك يابني..." قولي لابنك انك عارفة انه كان نفسه في المقلمة الزرقاء وانها فعلا حاجة تزعل انك ملاقيتيهاش مع انك نزلتي "مخصوص" عشان تجيبيها و تفرحيه قوليها بتعاطف..بس كده..واسأليه ان كان في حاجة يقدر يعملها عشان نحل المشكلة دي و اسمعيه بنفسه و هو بيقولك انه هيستعمل الخضراء السنة دي و هيحاول يدور على الزرقاء السنة الجاية لو ابنك حساس شوية اديله مساحة انه يعبر عن استيائه و يعيط لو عايز بس متاخديش الموضوع بشكل شخصي و تبدأي تزعقي و تدافعي عن نفسك دي مشكلته. اديله وقته و هو هيقوم بالباقي اولاويات كل شخص تختلف عن التاني كفاية تعميم كفاية احساس بالذنب قربي من ولادك اكتر فكريهم ان سعادتهم هي أهم حاجة بالنسبالك و ان عليهم يساعدوكي عشان السعادة دي تدوم 
|
|
العرض الشجري