|
 |
 |
 |
|
رقم المشاركة : ( 1 )
12 - 12 - 2016, 03:22 PM
|
|||||||||||
|
|||||||||||
|
موضوع نفسي اتكلم عنه من زمان.. وانا صغيرة كنت في عيلتنا بيتضرب بيا المثل في الشطارة... الشابة اللي على طول من الأوائل وبتاع... وبالتالي بقيت اما اقصر او اغلط فحاجة بيتقالي "ازاااااااي انتي قدوة!" كبرت وبدأت أخد بالى من لبسى وحشمتى ... وبالتالي برضه بقيت اما اقصر او اغلط فحاجة بيتقالي "ازاااااااي انتي قدوة!" كبرت كمان واتجوزت وخلفت واشتغلت وبقيت اكتب على الفيسبوك وناس كتير عرفتني... وبالتالي بقيت اما اقصر او اغلط فحاجة بيتقالي "ازاااااااي انتي قدوة!" بين المراحل دي بقى كانت بتيجي مراحل لطيفة كده ممكن نسميها "طرشئة من فكرة انتي قدوة"... مراحل تمرد وعك ولخبطة نتيجة الإبتزاز العاطفي الرهيييييب اللي اسمه "انتي قدوة" ... انتي قدوة فاتكلمي وفكري والبسي واكتبي بطريقة مثالية دايما عشان احنا مش هنتقبل منك غير كده! انتي قدوة فماتغلطيش!!... انتي قدوة فإحنا قاعدين لك على الكلمة والحركة والهمسة بنحللها! خليكي دايما مثالية! المثالية دي ضغط رهيب على البني ءادم وملوش اخر... انت مدرس فقدوة.. وانت دكتور فقدوة.. وانت اب وانتي ام وانت الكبير وانت وانت... بتفضل تدور على المثالية عشان تبقى "قدوة" لحد ما تطرشأ فعلا وتروح الناحية التانية خالص (وده مش عذر بس دي نتيجة)! واما تغلط ويبان شيء من "اللامثالية البشرية" اللي فيك - زي بقيت خلق الله - بيتشطب عليك.. ويتكلموا عنك... ويسمحوا لنفسهم يحللوا ويصدروا احكام ويهيصوا براحتهم وهما نفسهم يحولوك من "القدوة" الى "الحدوة" على رأي مسرحية العيال كبرت! انا عدى عليا أوقات فحياتي كنت بقول ياريتني كنت فاشلة عشان اعمل اللي انا عايزاه واهلي يفرحوا اما انجح لهم بدرجة! ياريتني ما كنت شاطرة فكذا عشان ماظهرش واتعرف وافضل شايلة هم مين بيتعلم مني ايه! حلو وجميل انك تبقى مثال كويس فى وسط الأمثلة السيئة اللي حوالينا! بس انت بنيءادم!! ولازم تبقى انت! على طبيعتك! ماتستمتعش بالنفخ اللي الناس بتنفخوا فيك وتتحول للكائن المثالي عشان تفضل فعينهم "قدوة" ... ماتتكسفش تظهر ضعفك ساعات... ولا تتعمد تتكلم بحكمة وعقل طول الوقت... خليك طبيعي.. بتضحك وتزعل وتهبل وعندك احلام ورغبات ونقاط قوة وضعف! ماتتعمدش الغلط! بس اسمح لنفسك تغلط! وسامح نفسك على كده! مش لازم كل كلمة تقولها تبقى "بتثبت" حاجة لحد او "بتبرر" حاجة لحد! تقبل فكرة انك "طبيعي" مش هتعجب كل الناس! وكل ما الفئة اللي بتأثر فيها إيجابياً زادت.. كل ما الفئة اللي هترفضك هتزيد برضه لأسباب مختلفة ومهما حاولت حتى تبقى مثالي! فالأحسن ليك وللي واخدينك قدوة دول انك تبقى إنسان طبيعي! ولو حد قالك "ازاااااي انت قدوة" قل له انت اللي فاهم القدوة غلط! وعشان الفهم الغلط ده... في ناس اتعثرت اما لقوا ناس ف الكنيسه غلطوا! وناس اتعثرت اما لقوا مشاهير عكوا! وناس وقعوا في تعميمات غلط "كل البنات كذا... كل الدكاترة كذا...انا عمري ما هثق فحد!" كل واحد فينا مسئول عن نفسه... وبيحاول يعمل احسن ما عنده ويأثر في اكتر عدد من اللي يعرفهم! بس مفيش حد مثالي! مفيش حاجة في الحياة مثالية! المثالية دي اصلا ضد طبيعة البنيءادم اللي مخلوق "خطاء"! فنبطل نضغط على بعض بكلمة "انتي قدوة"...ونبطل نفتن بعض بالمدح! ونتعلم من كل الناس اللي بنقابلهم مهما كانوا مش شبهنا... وندي كل حد قدره ونركز على نفسنا بقى شوية! واما تلاقي نفسك اتغيرت عشان "القدوة" بتاعك غِلط يبقى انت اصلا عندك مفهوم القدوة غلط! cpd 
|
|
العرض الشجري