بدون كلام

[walaa farouk]

== كل 3 شهور انا ومراتي بنعمل يوم اسمه بدون كلام،، بنسيب الأولاد عند ماما ونطلع يومين اي مكان،، نقعد يوم بليلة ما نتكلمش ولا كلمة مع بعض،، نتكلم بعنينا بس ،، هي تعرف اني نفسي أكل اكلة معينة أو اشرب حاجة معينة أو اسمع مزيكا معينة أو اتفرج ع فيلم معين،، وانا اعرف ان نفسها اني اخدها في حضني أو اشغلها فيلم أو افتح رواية بنحبها احنا الاتنين ونقراها بعنينا سوا،، 24 ساعة من غير كلام بيخلينا نحس ببعض،، كل واحد فينا يحس التاني محتاج ايه من غير ما نتكلم،، عشان نعود بعض اننا نفهم بعض بعنينا،، موضوع بدون كلام دا خلانا نشوف بعض من جوة،، عشان كدا بقالنا سنتين ونص من غير ولا خناقة،، عشان بندرب نفسنا كل واحد يحس ب احتياج اللي قدامه بدون ولا كلمة..

==من كام يوم راكب ميكروباص وكان فاضل كرسي واحد،، وفيه ست قاعدة جنب الكرسي الفاضي ومعاها طفلين كل شوية ينزلوا من على رجلها ع الكرسي الفاضي،، وهي ترجع تشدهم تاني على رجلها،، بصراحة كنت عايز اقول للسواق اطلع وانا هشيله لأن واضح ان مش معاها فلوس تاخد الكرسي والمشوار طويل وهتتبهدل بالأطفال ،، بس مكانش معايا فلوس زيادة 😕 فيه واحد راكب هو ومراته واضح انه حس بنفس احساسي فقال للاسطي اطلع هشيل الكرسي الفاضي،، العربية اتحركت والست بتشد عيالها ع رجلها بالرغم أن الكرسي فاضي،، الراجل قالهم اقعدوا يا حبايبي على الكرسي براحتكم،، الست قعدتهم وبصت لورا للراجل وابتسمت،، نظرتها كان كلها شكر لأنه حس باحتياجها بدون ولا كلمة ،، زوجة الراجل بتقوله ليه كدا 😡 قالها حسي باحتياج الناس يحس ربنا باحتياجك

==حسوا باحتياج اللي حواليكم بدون كلام،، كتير بنضحك واحنا جوانا مشاكل وبلاوي،، بنداريها عشان ما نضايقش اللي حوالينا،، حسوا باللي جوانا بدون كلام ركزوا في نبرة الصوت ونظرة العين والتفاصيل،، الضحك بيبقى متداري وراه وجع،، حسوا بدون كلام،، مش لازم نتكلم

== حسوا باحتياج اولادكم وابهاتكم وامهاتكم واخواتكم وزوجاتكم وتلامذتكم،، وازواجكم وحبايبكم وصحابكم،، حسوا باحتياج اللي قدامكم،، حسوا باللي بيداروا احتياجهم