حب ولا اعجاب

[walaa farouk]

الحب ليس شعور مفرد .. الحب هو مجموعة من المشاعر تجتمع مع بعضها لتُكَون الشعور الأعظم وهو الحب .

أي شعور مفرد يبقي إعجاب مش حب .

بس للأسف في ناس بتخلط بين الحب والإعجاب !

لما اتنين بيقابلوا بعض لأول مرة ( تلاقي بنت ماشية في الشارع وبتطلع حاجة من شنطتها ومش واخده بالها من الطريق والشاب طالع من عربيته مش واخد باله من اللي جاي من وراه ويلف فجأه يلاقيها في حضنه .. وشنطتها تقع علي الارض ويوطوا هما الاتنين عشان يلموها فا دماغهم تخبط في بعض ! وبعدين نظرة طويلة دراماتيكية ) ويحصل بينهم الشرارة إياها ، ويقعوا في الحب من أول نظرة .
دة كلام أفلام ملناش دعوة به .
وإن حصل بشكل أو بأخر فا دة إسمه إعجاب .
الشرارة دي مانقدرش نقول عليها حب .

في فرق كبير أوي بين الحب والإعجاب .

الحب بمعناه العميق بيجي مع التعامل ، الحب بيجي مع معرفة صفات وطباع الطرف الاخر وكل ما تعرفه أكتر إحتمالية الوقوع في الحب بتزيد ، دة لو الصفات دي جت علي هواك وتوافقت معاك

ليه سموه الوقوع في الحب ؟

عشان بتتدهول علي عنيك مع اللي بتحبه وتتخلي عن كل الأقنعة اللي بتستخبي وراها في حياتك اليومية.

ممكن تكون معجب بشخص لصفة واحدة أو عدة صفات لكن مش شرط تحبه.

والإعجاب مراحل ، في إعجاب أولي .. بأي شخص بيبقي غالبا علي المظهر العام ، سواء اللي خلقه به ربنا زي ( وسيم ، جسمها حلو ، طويل وعريض المنكبين ، أسمر ، عنيها واسعة ، جميلة )،
أو حسن أختيار منه أو منها ( حسن المظهر ، شيك بتلبس كويس ) .

ممكن مشاعر الإعجاب تزيد في المرحلة اللي بعد كدة بزيادة معرفة صفات الشخص زي ( ذكي ، لبقة ، شجاع ، مؤدبة ، محترم ، فكاهي ، دمها خفيف ، يعتمد عليه ، الخ ) .

بس لازم نعرف إن التنقل بين مراحل المشاعر عامل زي التنقل بين دواير جوه بعض ، الدايرة الكبيرة ( التعارف ) وبعدين الدايرة الأصغر ( الإعجاب ) وبعدين ( الحب ) وأخر وأصغر وأضيق دايرة عشان لما بيكون الحبيبين فيها مابيحسوش باللي حواليهم - بيكونوا في ملكوت تاني خالص من كتر الهيام هي دايرة ( العشق ).

التنقل من دايرة التعارف للإعجاب دة بيحصل دايما بين العلاقات العادية المستمرة بين البشر لشعورين دائمين .. ودة لكل الناس .. بين الزملاء في اي مكان وبين الأصدقاء وبين الجيران وبين اي كائن وأخر اختلف جنسه او تشابه .
هما شعوري الانسجام والارتياح .
في ناس بتندفع ورا الشعورين دول وتنط من دايرة الإعجاب للحب بسرعة وغالبا بيبقي سوء فهم أو إحتياج للحب ، بس للاسف بيخبط في صخرة الواقع ويدمر نفسه ذاتياً ويحسبها علي نفسه علاقة وفشلت ( ويدخل علي الفيس بووك ويغير اسمه لأمير الأحزان وهاتك يا أغاني هجر .. وهي تغرق الوول عندها بوستات حزينة من اللي فيها صورة وردة علي الارض ومكتوب علي الصورة محدش بينجرح اوي غير لما بيحب اوي - حبك برص ) ، مع إنه كان إعجاب ومن طرف واحد وهي أبعد ما يكون إننا نسميها علاقة أو تجربة اصلاً .

وده حال نسبة كبيرة جدا من الشباب .. الاستعجال !
رتم الحياة بقي سريع اوي فوق مانتخيل.
كل حاجة بتجري وبسرعة ، وعشان كدة بيبقوا عايزين يحبوا بسرعة !

خد وقتك في الإعجاب .. أستمتع بكل صفة بتقربك من الطرف التاني .. حاول تفهمه اكتر عشان عقولكوا تتلاقي ، بدل ماتضيع وقتك ووقت الطرف التاني في أوهام الحب وانتوا اصلاً مش في دايرته .
وبدليل تلاقي كتير أوي من قليلي الخبرة بدوائر المشاعر علاقتهم بتنتهي وهما في الجامعة .. بعد شهر أو سنة أو قبل ما يتخرجوا بيوم حتي .
لقلة النضج .

اه هي دي الكلمة .. النضج .

عشان تستمع بأي حاجة لازم تكون في تمام النضج ، والنضج يعني الحاجة تستوي علي نار هادية.
الحب حايجي حايجي بس بعد تمام النضج وبالهنا والشفا .

الحب هو أحلي شعور في الوجود .. بيخليك مضطرب مش عارف فرحان ليه وطاير من السعادة ليه ؟!