السراب

[walaa farouk]

الجميع واقفون علي أعتاب دائرة الحب يبحثون عن المدخل متلهفون لتذوق عسل المشاعر الذين يسمعون عنه في الروايات وبين سطور أبيات الشعر ويرونه في أفلام الرومانسية .

كلٌ يبحث عن المدخل بطريقته سواء كائن رقيق تحركه المشاعر أو كائن صلب عقلاني .

الجميع في احتياج لخوض التجربة ، فإذا كان الدافع هو الفضول ! فا الغريزة هي محرك جميع الدوافع .

بس أحياناً البحث المستمر ومحاولة إقتحام دايرة الحب بيجلب لنا المشاكل واللخبطة ونقع في شرك الحب من طرف واحد ونعيش في عالم الأوهام وفي الاخر بنلاقي الحقيقة بتلسع الناس علي قفاها عشان تفوق !

هو دة ممكن يحصل ؟!
إن حد مش عارف الفرق و يعيش الوهم وهو فاكر ان الطرف التاني بيحبه وبيبادله نفس المشاعر ؟!
آه بيحصل .. وحصل معاكي ! وحصل معاك ! ... صح ؟

البنات اكتر عرضة للمواقف دي ( مش تحيز طبعا بس هن عاطفيات اكتر اما الرجالة تٰقال شوية ) .

تلاقي البنت بتقنع نفسها ان فلان معجب بيها أو يمكن بيحبها كمان ولما تسألها عرفتي منين ! هو قالك ؟
تقولك : ده مهتم بيا ، بيسأل عليا ، ولما أطلب حاجة بيساعدني ( فلاش باك : الاهتمام احتياج البنت الاول ) .

لا .. خدي بالك في رجالة بالنسبة لهم عادي جداً انهم يعطوا الدرجة دي من الاهتمام للجنس الأخر ( المفروض برده ياخدوا بالهم عشان ده بيعمل لخبطة لبعض البنات ) فا ماتتسرعيش بفتح خزان مشاعرك في المرحلة دي مع أي شاب .
وأعرفي أنه زي ماهو احتياجك الاول كا أنثي فا هو ممكن يكون نقطة ضعف في حائط الحماية بتاعك ضد السفلة والمعاتيه .
و دول بيدخلوا من نفس المدخل ( الاهتمام ) .

أمتي تعرفي انه مش الحب !
النوع الجنتل مان حتلاقي اهتمامه بارد مش حتلاقي الدفء في كلامه ولا في عنيه ولا حتي في ودانه ،
اما النوع السافل الوغد ( ترجمة انيس عبيد ) حتلاقي الاهتمام خرج لنطاق ابعد من حدود العلاقة العادية .
للأسف في بنات بتغوص وتضعف فاتغرق تحت مسمى الحب ( اللي بيحصل في الأفلام بيحصل فعلا في الواقع )

كل حاجة في الدنيا مادية أو معنوية منها الأصلي الغالي ومنها الرخيص ما تم صنعه تحت السلم .
والغالي تمنه فيه ، ولو مش معاك تمن الغالي .. حوش أحسن وماتستعجلش .
........

ألو ؟ هو انت حاتيجي امتي عشان تخطبني من بابا ؟
نعم ! أخطبك !! ليه ؟!
ما تستهبلش .. انت مش كل يوم بتقولي صباح الخير و بتعملي لايك علي ال ....... !! ألو ! ألو ؟
تيت تيت تيت ..
( هذا الهاتف خارج نطاق الكرة الارضيّة )