اتعاملى مع حماتك صح

[walaa farouk]

1/اول حاجة عايزة اقولهالك اننا فى حرب حقيقة مش حرب بسلاح ولكن حرب بشئ اكبر من كده وهو هدم استقرار البيوت .. بصى الحرب دى مصدمكيش من قديم الزمن وهو الإعلام المصرى ؟؟ ماله بقى ؟؟
هقولك فى افلام كده مشهورة جدا زى فيلم ( الحموات الفاتنات /// وفيلم حماتى قنبلة ذرية /// فيلم حماتى ملاك /// وفيلم الشقة من حق الزوجة /// واخرهم مسلسل كيد الحموات اللى كان بطولة سوسن بدر..
** رسخوا فى عقولنا ان الحماه دى هم ما يتلم .. الحماه قنبلة فعلا ذرية ..من كتر ما بنشوف ده فى القنوات اللى بنتفرج عليها .. رغم ان حماتك دى ممكن تكون امى الطيبة وحماتى ممكن تكون امك الطيبة بس لمجرد انها تبقى حماتى انا مش هشوفها غير حد موجود عشان يزهقنى وبس .. حاولى تغيرى الفكرة دى ومتتأثريش بالحاجات اللى بتتفرجى عليها .. هو عشان الفيلم يجيب اجر اعلى لازم يبقى فيه مواقف من دى لان لو الحياة ماشية سعيدة محدش هيتفرج على الفيلم ..

2/ متسمعيش كلام اللى حوليكى كل واحد لى شخصيته يمكن اللى بتذم فى الحموات قدامك هى شخصية اصلا مبتعرفش تتعامل فمتخلهاش تعقدك على الفاضى .. وتبقى مستعدة للأسوء بسبب الكلام اللى سمعتيه..

3/ام زوجك هى حد تعب وكبر وسهر الليالى وشافت كتير اوى لحد ما بقى ابنها راجل .. بلاش انتى بقى تحسسيها ان مجرد دخولك فى حياتهم لغى وجودها وقدرى ده لانك فى يوم هتكونى ام وهتفهمى يعنى ايه تكبرى وتتعبى فى ابنك وفجأة يبقى لى حياة جديدة بعيدة عنك ..

4/ حاولى تعدى ليها اى زلة وتلتزمى السكوت لو هى قالت حاجة تزعلك .. متقفيش على الوحدة .. بس طبعا لو لقيتى بتستغل احترامك ده وتزيد اكتر يبقى لازم تخدى موقف ..

5/ من الأول كده وعشان منرجعش نقول انا بعاملها احسن من امى وبرضة مبيتمرش فيها .. حاولى اول فترة زوجكم تستنى تفهميها عشان من ثم تحددى شكل العلاقة بينكوا هتبقى ازاى .. لكن العكس هو اللى بيحصل اول ما تتجوزى بتعمليها احسن معاملة بتدخليها فى حياتك جدا وطبعا لو هى مش شخصية كويسة مش هتقدر ومش هتفهم كل اللى بتعمليه بل بالعكس هى هتعتبره واجب عليكى ..

6/ ياريت تضعى حدود معاها يعنى مينفعش تديها مفتاح شقتك ومتعمليش اى حدود وبعدين ترجعى تشتكى انها بتجيب ولادها فى الشقة وبتلاقى عفشك اتكسر منه حاجات انتى اللى جبتيه لنفسك ..

7/بلاش تحسسيها انك تفوقتى عليها يعنى لو هى بتعرف تعمل اكله معينة وانتى عرفتى الطريقة وعملتيها احسن منها بلاش تظهرى قدامها انك تفوقتى عليها وافضلى قوليلها ده بفضل نصايحك ليا يا ماما وتعبك معايا طبعا هى هتعيش عليكى دور مبتعرفيش تعملى حاجة من غيرها وان هى اللى عماله تعلمك .. معلش خليها تحس بكده حاسسيها بوجودها ..

8/قوليلها يا ماما كنت لفترة قريبة شايفة ان عيب اقوول لحد غير امى يا ماما وان مفيش حد زى امى وكل الكلام المعروف ده .. بس متعرفيش الكلمة دى بتفرق فى نفسها قد ايه .. حتى لو قالتلك عادى قولى يا طنط زى ما انتى عايزة بس بيبقى فى حاجة جواها منك .. فمعقولة اللى تعبت وربت ابن كبير بقى ليكى زوج متستهلش تكون امك؟
9/ من اولها حددى مواعيد معينة تزوريها فيها ومواعيد تزورى مامتك عشان مترجعش تلومك بعد كده لو مجتيش اللى اوله شرط اخره تفاهم وطبعا ده ميمنعش انك تزوريها كل ما تيجى فرصة بس جنب ده يكون فى يوم ثابت احسن ..

10/معروف ان الزوجة بتبقى قريبة اكتر مع حماها حاولى تاخدى بالك ومتفضلهوش عليها عشان هى زيها زى اى ست بتغير على زوجها..

11/ اوعى تضعى فى حسابتك ان اى خير هتعمليه معاها بتعمليه عشانها .. لان من اول موقف هى هتقصر معاكى فيه هتتعبى .. دايما اى خير بتعمليه اعمليه لله عشان لو البشر مقدروش متندميش على التعب اللى راح على الفاضى وتبقى عارفة ان فى ربنا شاهد على حسن كرمك ليها ومعاملتك..

12/ اسالى زوجك عنها وعن الحاجات اللى بتحبها وتقبلى الاختلاف بين بيتك وبيتهم فى طريقة الأكل وطريقة الكلام واللبس ومتتريقيش عليهم واعرفى انك طول ما انتى مش عاملة لنفسك قيمة وسط اهله متلوميش حد لو استهان بيكى ..