في حاجة اسمها فن الاهتمام

[Rena Jesus]

بيعجبني اوى لما الاقي ام واخدة اولادها علي كافيه وتقعد معاهم علشان تشاركهم حاجة بيهتموا بيها وبالرغم ان ده مش مكانها او جوها بس بتحسسهم انها فرحانه معاهم ،،
مع انها ممكن تقولهم لا تعالوا نروح نشتري طلبات وانتوا كده هتغيروا جو



او راجل بسيط علي قد حاله يدوب بيجيب لقمة عيشه ميعرفش في الدنيا غير شغله وطلبات البيت بس اول الشهر يدخل علي مراته بشويه ورود علشان يفرحها ،،
مع انه ممكن يدخلها بكيلو كباب

او اب قاعد مع ولاده الصغيرين وعمال يعملهم حصان ويلف بيهم الشقه ويعملهم قطر علشان يعوضهم عن عدم وجوده فترات طويلة ،،،
مع انه ممكن يديلهم فلوس ويريح دماغه

او واحد بيلغي مشوار مهم علشان خطيبته معاها مشكله وهو عارف انه مش هيقدر يحلها بس عاوز يكون جنبها ويسمعها علشان ترتاح ،،،
مع انه ممكن يقولها لما ارجع بليل هتصل بيكي

حلو اوى انك تكون عاوز تهتم باللي قدامك وتوصله اهتمامك
بس الاهم انك تعرف هو محتاج ايه بالظبط وايه اللي ممكن يفرحه ويبسطه

ممكن تكون عمال تقدمله حاجات ومستغرب ليه هو مش مبسوط بالرغم من انك مش مقصر من ناحيته
بس الحقيقة انك ممكن بتكون بتضيع مجهودك بشكل غلط وفي حاجات مش بتفرحه بس انت فاكر انك قدمت افضل ماعندك

في صورة منتشرة لقرد ماسك موزة وعمال يجري ورا قطه عاوز ياكلها موزه ومزقطط بس هي مش مرضتش تاكل فوقف هو متنح ،،
طبعا بالنسباله الموز ده افضل حاجة في الدنيا بس القطة ولا يفرق معاها

في حاجة اسمها فن الاهتمام ،،
وفن انك تعرف توصل اهتمامك للي قدامك
وعلشان تهتم بيه صح ،، لازم تعرفه وتعرف احتياجه صح