بص يارب. .. هجيب م الاخر

[walaa farouk]

#انا
بص يـارب هجيب م الآخـر
من غير شكليات و مظاهر
انا مش عايزك تبحث عنى
لانا مفلوج ولا حتى لـعازر
#ربنا
ازاى طـيـب هـابقى ابــوك
ازاى ممكن اسيـبك تمشى
واعمل زى ما ناس نسيوك
سابوا الدمعه مبتفارقكشى
#انا
مين قالك هفضل على حالى
وهعيش عمرى الجاى كـئيب
بكرة الضحكة أكيـد جـايـالى
مانا مش دارى بعلم الـغيب
#ربنا
مين قالك هتكون مرتاح
و انت بعيد عن حضنى تملى
او هتدوق طعم الافـراح
غـير لما هـتطلـب و تـصـلى
#انا
يمكن فعلآ اكون محتاج
والخطوات مشلولة وعاجزة
و صعب الاقى لمرضى علاج
طاب ماتروح للناس الجاهزة
#ربنا
بس انا جاى عشانك انت
فكر مين محتاج لـطبيب
غير لو ناس تعبانة ومرضى
المحتاجة جروحها تطيب
#انا
بس انا أملى صبح مقطوع
مابقاش فيا فوايد أصــلآ
بضحك بس مخبى دمـوع
وشى سعيد والقلب بيحزن
#ربنا
مش من حقك تيأس منك
و لا تحكم و بدون تــبريـر
سيبنى اشكل تانى ملامحك
و هترتاح اوى بالـتـغـيـير
ارمــى تكالك كله عليا
و الجألى من غير تـفكير
خليك ماسك كده فـ ايديا
هتشوف حتى لو انت ضرير
#انا
طب و التعب المالى كيانى
دانا لو مـــت هكون مـرتـاح
الشهوات دايمآ شــــدانى
و بـتسرق مـنى الأفـــراح
#ربنا
جرب مـره تقول محــتاجلك
هتحس براحــه جــواك
اياك مره تعيش فـ مشاكلك
من غير ما تكون ايدى معاك
#انا
بس انا ياما نكرت فـ خـيـرك
عمرى ماكنت بمثل صورتك
عذبتك .. دقـيت مساميرك
ياما جرحتك ياما خسـرتك
#ربنا
عمرى فـ يوم ماهبطل اسامحك
او هزعل من جرحك ليا
مهما هتعمل برضو مــسامحك
شايلك جوه فـ نن عنيا
#انا
لا يا يسوع مش هقدر أرجع
مانا مش ناسى عمايلى السودة
دانت بسببى بقيت متوجع
لما تركت ايديك ممدوده
#ربنا
ازاى بس هتبعد عنى
ليه تكابر..ارجع لاحضانى
و ازاى قولى .. راح اسيب ابنى
يفضل طول ايامه يعانى
جرب دوق و ف قربك منى
هتحس انت سلامك تانى
#انا
معقول بعد داكله عايزنى
لسه ياربى .. باقى عليا
ازاى قابل يوم تسامحنى
بعد ماشوهتك بــ خطية
انا اسف يايسوع ارحمنى
قلبى معاك اتصرف فيه
نقى وشيل من جوا اغسلنى
عوض عمر ندمت عليه
#ربنا
مهما جاوبتك راح تحتار
قلبى ف يوم ابدا ما نسيك
و ان كان ليك البعد قرار
برضو هدور تانى عليك
بص بلاش نتعاتب احسن
أصلى انا ناسى بعادك عنى
اوعى اليأس ف يوم يتمكن
و يخليك تهرب تانى منى
#انا
لا يا يسوع أنا أصــلآ نــادم
وكفاية اللى عملته انا فيك
سايب دنيتى ليك ومسالم
و على قد ماهقدر هرضيك