أصبرى كده ....... وشوفى

[Rena Jesus]

نصيحة من زوج ورب أسرة لكل بنت بييجى لها حالة من الإنبهار والـ"هيييييييحححححح
" قدام كل فيديو كليب معمول فى فرح ........ولا photo session متصور........... ولا حركات شموع وورد
و banner متعلق عليها كلمتين حلوين.................... ولا تصوير proposal" ..

وبعد مصمصة الشفايف تقعد البنت تقول "يا ترى فين الرجالة اللى من النوع ده؟!" ..

صدقينى مش هو ده المقياس اللى تدورى به على نوع الرجالة:

• شوفى نوع الرجالة اللى واقف يغسل المواعين مع مراته عشان هو عارف إنها بتشتغل زيها زيه ومحتاجة اللى يساعدها فى المطبخ

• شوفى نوع الرجالة اللى ممكن يقضيها بعلبة تونة لو كنتى تعبانة فى يوم مش قادرة تطبخى، وممكن ياكل من نفس الأكل يومين عشان ما تضطريش تطبخى لسيادته كل يوم طازة بطازة

• شوفى نوع الرجالة اللى بيصعب عليه مراته تقف فى الحر ولا فى عز البرد فى البلكونة فبيروح هو يلم الغسيل أو ينشره

• شوفى نوع الرجالة اللى بيقوم يجيب لنفسه يشرب مية وممكن يعمل لنفسه كوباية قهوة ويعمل لمراته معاه الشاى بتاعها

• شوفى نوع الرجالة اللى بيروح هو يعمل الشوبينج ويجيب إحتياجات البيت

• شوفى نوع الرجالة اللى مش بيتكسف يقف عند الخضرى والفكهانى يشترى الخضار والفاكهة

• شوفى نوع الرجالة اللى بيقسم مسئولية المذاكرة للأولاد بينه وبين مراته، مش بيسيبها هى تتدبس فيهم لوحدها وهو مقضيها فرجة على الماتشات أو قعدة على القهاوى

• شوفى نوع الرجالة اللى ممكن يقسم معاكى مهام توصيل الولاد للدروس أو النادى، مش يدبسك فيهم لوحدك.

هى دى بقى نوعية الرجالة اللى تدورى عليها،
مش اللى عامل photo session يجنن، ولا قال أغنية wooooooow فى فرحه.

الرك على الحياة بعد كده .. هى دى الاختبار الحقيقى!!

أصبرى كده على اللى عملوا photo session .......وأغنية وكليب و proposal
لما تطحنهم الحياة وشوفى حالهم بعد الجواز بكام سنة وأحكمى ساعتها.
وشوفى برضو اللى إتجوزت نوع الزوج اللى ذكرته ده،
وصدقينى هيبقى هو برضو اللى مش بينسى عيد ميلاد مراته، ولا عيد جوازهم،
ولا أى ذكرى حلوة جمعتهم ببعض، وبيجيب برضو ورد وهدايا ودباديب وشوكولاتة.

ملحوظة للأزواج والشباب:
ينبغى أن نهتم بهذه ولا نترك تلك، وماتدوش فرصة للبنت تبص على غيرها وتقول "هييييييححححححححح".
___________________________
التوقيع: زوج بيجتهد يكون الراجل اللى بيسعد أسرته