مجموعك... انهارده...

[walaa farouk]

- مجموعك ( النهارده) مش هيحدد مصيرك ..
-مجموعك ماهو الا مجرد 'رقم' قاس مجهودك فى -الحفظ- طول الاشهر الى فاتت ..
-مجموعك ( مجرد) رقم ، مش هيبقى ليه اى لازمه كمان 10 و 15 سنه من دلوقتى ..
-مجموعك لو فعلا تعبت وجبت اخرك وعافرت ومجبتش ( المجموع)-
اللى يدخلك كليتك الى نفسك فيها ، يبقى مش مشكله
واعتبرها اول 'عقبه' فى طريق نجاحك

كل الناجحين وقعو فى بداياتهم .كلهم بلا استثناء .
كل العمالقه فى اى مجال مخلوش 'مجموعهم' او تقديرهم يعوقهم عن اهدافهم واحلامهم
بيل جتس ' مؤسس #microsoft واغنى رجل فى العالم كان بيسقط فى مواده فى الكليه .
ستيف جوبز صاحب شركه #ابل كان معاه مجرد ثانويه .
تونى روبينز 'القطب الاكبر فى التحفيز والتنميه الذاتيه' معاه مجرد ثانويه .
مارك زاكربرج مؤسس وصاحب #facebook مكملش كليته .

احنا فى عصر المعرفه المفتوحه ، مش الشهادات
الخبرات مبقتش بالسنين اد ما بقت باد ايه بتطور نفسك فى مجالك باستمرار وبتنجز فيه .
احنا فى عصر Google و ال YouTube و ال Wikipedia
اللى خلى تبادل المعلومات اكثر سهوله وبوفره .
احنا فى عصر ( المعرفه) الغير محدوده على النت .
زمان كانت المعرفه مقصوره على الناس اصحاب النفوذ
واللى كان معاهم فلوس يدخلو كليات ( مكلفه) علشان يقدرو ينجحو فى سوق العمل .
دلوقتى بقت الكورسات ماليه الانترنت بفلوس بسيطه وكتير بتكون مجانيه وببلاش .
الندم ملوش لازمه ، العياط مش هيغير مصيرك .
لسه قدامك فرصه تصنع مصيرك ومستقبلك من اول وجديد
وافتكر ان ربنا دايما بيدينا فرص تانيه فى الحياه .

دوّر ، عافر ، امسك ورقه وقلم واعمل خطه بديله حط فيها هدفك الجديد
واعرف انه العقبات الى بتواجهها دلوقتى وبتغير مصيرك ..
هتشكر ربنا عليها بعد كام سنه قليلين من دلوقتى.
.