ما هو مش بنى ادم

[walaa farouk]

بص يابني..
ماتتخضش لما تلاقي صاحبك أو حبيبك بيمشي ويبعد .. عارف إنه وعدك مليون وعد إنه مش هايمشي ووعدك مليون وعد إنه هايفضل جنبك حتى لو حصل إيه .. ومع أول غلطة سابك ونسي كل الحلو.
ماتتخضش إنه مكمل حياته عادي .. ماتتخضش لما تلاقي نفسك لوحدك في يوم وكله عمل عبيط.
هي دي النفس البشرية .. ممكن تبيع في ثانية .. ماتلومهوش إنه قدر يكمل من غيرك بعد ما كان ملازمك يوم بيوم وشهر وسنتين.
هو إنسان والإنسان بيقدر يقطع العلاقات عادي.
هاقول لك على حاجة باحاول اجربها وياريتها تنفع معاك.
روح للي عمره ما هايبيعك حتى لو غلطت فيه .. روح للي مش هايجرحك ويسيبك رغم إنك سيبته كتير.
ويابختك لو ليك علاقة حقيقية معاه .. ماهو مش بني آدم.