دليلك للبقاء حيا في غرفة العمليات

[Rena Jesus]

دليلك للبقاء حيا في غرفة العمليات -
(النسخة الخاصة بالمريض والموجهة لمستشفيات وزارة الصحة , ومنطقة الشرق الأوسط , والدول المحبة للسلاح)

1- لاتكذب على طبيب التخدير ...
لاحظ أن دكتور التخدير بالنسبة لك زي سواقين التاكسي (غالبا مش هتقابله تاني عشان تركب معاه) ..فبلاش تكذب بخصوص حالتك المرضية.. أكلت اخر مرة امتى ..حساسية من (شيء ما) ..السجاير اللف اياها ..أدوية ضد الاكتئاب اللي بتبلبعها من ورا المدام ..عملية القلب المفتوح اللي عملتها من سنتين ...الخ
مثال : شابة في العشرينات هتعمل عملية تجميل بعد حرق .. عملت عملية قديمة وجالها حساسية قاتلة ونادرة من دواء مرخي للعضلات .. ربنا سترها وعدت ومعاها ورقة عشان تديها لأي طبيب تخدير يسألها قبل أي عمليات أخرى في المستقبل .. خافت تقلق دكاترة التخدير (كتر خيرها) ..خبت الورقة ..أخدت نفس الدوا ..تكرر نفس السيناريو .. توقف قلبها ..استجابت للانعاش وقعدت فترة في العناية المركزة قبل أن تخرج بالسلامة بحثا عن ضحية جديدة في المستقبل.. لو ماتت كانت هتبقى فرصة ذهبية للطرشجية بتوع (الحقنة القاتلة) .. وتبقى (فلانة) ضحية الاهمال ...خلي بالك ..دكتور التخدير ممكن جدا يكون هو الضحية
..
2- بص في ورقتك
قبل ماتدخل غرفة العمليات منتظرا دورك في غرفة الافاقة..وارد تلاقي ناس لسة خارجة من العملية ..بتخطرف .. بترجّع .. بيحصلهم تشنجات ..أو بيتألموا وهم في مرحلة الافاقة ..ماتشغلش بالك بيهم ..انت ماتعرفش مين عنده ايه.. خليك في حالك.. العب كاندي كراش ..أو عد صوابع رجليك ..وتاكد ان صوابعك ...مش زي بعضها
..
3- لاتتفلسف
ارمي نظرياتك الوجودية عن التخدير والجراحة برة باب العمليات .. بلاش تقترح اقتراحات بناءة من عينة (عاوز بنج رش) .. (نيمني الأول وبعدين شكني ..اصلي عصبي وبتخض جامد) .. (عاوز خياطة بالليزر) ..(عاوز غرز تجميل وبنطلون استريتش) ..الخ ... مفيش بنج رش ..مفيش خياطة بالليزر.. والشكة قبل التخدير والفتح قبل التسليك .. مادام لجأت للدكتور ووثقت فيه بلاش تسمع كلام صحابك وجيرانك وذكرياتهم ..دع الصحة تاخذ مجراها ..وتأكد ان فيه حاجات كتير الناس كانت بتحلف انها حقيقية وطلعت خرافات ..ولنا في (كور النار اللي في علب كنتاكي ..وسي سي كيور) عبرة
..
4- استمع جيدا قبل أن تحكم
من حقك تلاقي افضل رعاية ممكنة ..من حقك حد يريح بالك ..ومن حقك تختار طريقة علاجك وتخديرك مادام عندك الوعي الكافي.. من حقك ان دكتور التخدير يشرحلك خياراتك (ان وجدت ..لأن فيه عمليات اختيارات التخدير فيها محدودة) ..لازم تسمع منه ..لازم تحيد انطباعاتك المسبقة ..لازم تتأكد ان دكتور التخدير عاوز مصلحتك لأنه (شاء أم أبى) ..معاك في نفس المركب ..وعلشان اريحك ..مادام معندكش مشاكل صحية معينة ..من حقك ترفض التخدير النصفي (ابسط ياعم)
..
5- اياك والاستخسار
طبيعتنا كمصريين حاسيين طول الوقت بعدم الأمان فبنستخسر ..عشان كدة بنحوش .. بنطلب زيادة من أي شيء مادام ببلاش .. بنروح الوحدة الصحية نشتري تذكرة بجنيه عشان ناخد تلات اصناف من ادوية عارفين انها مش شغالة .. انما هو كدة ..استخسار ..احنا شعب يتميز بانه عمل (أوضة) ..لل(كراكيب) ..عشان (يمكن تنفع) يوما ما ..فبلاش تتعامل بالمنطق دة مع الشكوى ..بلاش تشتكي من باب الاحتياط عشان الدكاترة يتوصوا بيك في المسكنات ..والمسكنات (شفاكم الله) مش من انواع الطحينة أو اكياس الكاتشاب .. فيه مسكنات بتبهدل كبدك ..وفيه مسكنات بتقطع نفسك ..فاشتكي بالعقل
..
6- لاتسأل عن الزمن
من اشهر الاسئلة اللي المريض بيعشقها لسبب غامض (أنا هاخد وقت اد ايه في العملية؟) فيصبح الرد المنطقي (ليه ..عندك مشوار؟) ..انت هتتبنج مش هتحس بالزمن .. مش هتعرف نمت امتى وصحيت ازاي .. وهتنسى انك سألت ..وهتنسى اني جاوبت ..السؤال دة منطقي اكتر من اهلك المنتظرين بالخارج ..ولهؤلاء المنتظرين أهمس (محدش بيتخدر على باب العمليات ..ممكن تكون العملية فتاق مثلا وقريبك داخل من اربع ساعات ..دة مش معناه ان بقاله اربع ساعات متخدر..ممكن جدا يكون لسة مادخلش الغرفة ولا التخدير بدأ ..ودة وارد في قائمة عمليات مزدحمة ..وارد ان أي عملية فيهم تطول عن الوقت المتوقع , وكل عملية بتطول بتاخد من وقت اللي بعدها ..وهكذا تتراكم الساعات عزيزي المنتظر .. فلا تقلق انها سُنّة الطابور
..
7- تجنب الشك والعصبية
انت داخل تعمل عملية مش تشتري من مطعم تيك أواي .. فيه ناس عندها عنف وعصبية غير مبررة لما بتتعامل مع الدكاترة والتمريض ..كل واحد له طقوسه للتعامل مع القلق ..ناس بتدعي ..ناس بتقلش ..لكن مش مفهوم ليه الشك والعدوانية تجاه ناس انت خلاص استأمنتهم على جسمك وحياتك ..العصبية هنا طفولية جدا وغير منطقية حتى لو كنت قلقان ..ريلاكس ..انتهى اوان التراجع .. انت خلاص وقعت في الخية يابرنس
مثال : سيدة اربعينية من هذا النوع داخلة غرفة العمليات متوجسة ..تتأمل الغرفة والجدران بقرف مبالغ فيه .. تهتف فجأة بعصبية وشك قاتلين (مش شايفة بنج يعني في الأوضة!!؟) ..فيجيبها طبيب التخدير ببساطة (ثواني ياحاجة ..هو كبير وهاتلاقيه داخل علينا دلوقتي)
..
8- تصرف كالناضجين
المريض الهاديء اللي بيتجنن ساعة التخدير ويتحول لطفل.. استنى استنى استنى ...دي حقنة ايه؟! ..مالها كبيرة كدة؟! ..هاخد كل دي ؟!! عزيزي القلقان ...اهدا يامان .. ممكن نتعامل مع الأطفال باللين والخديعة ..او بتكنيك (التكتيف) والغاز المخدر ..انما انت ماشاء الله ..رجل ناضج طول بعرض ..مفيش عدد كافي من طاقم العمليات لتكتيف سعادتك .. وذكاءك المدمر لايسمح بخداعك ..انت الآن في قلب الحدث ..بعد مراحل الكشف والتحاليل وتحديد يوم العملية.. استسلم ..ودع الحقنة تسري في عروقك ..انت جاي تتوب هنا؟!!
..
9- لاداعي للفصال
بلاش بنج نصفي..طب بلاش تشكني تاني ..طب بلاش كانيولا كبيرة اللي في ايدي حلوة والله.. طب بلاش تحط ماسك الأوكسجين على بوقي عشان بقرف
بص ياريس ..قدامنا اختيارين عشان الحياة تستمر.. ممكن نعمل العملية كلها بدون شكة الكانيولا السخيفة بس حاول تستحمل مشرط الجراح وابره وخيوطه .. وجهاز الكي ..والنشر والتقطيع والتفعيص.. وياريت تصلب طولك وبلاش ضغطك يقع منك.. وحاول تاخد نفس كويس لأن فيه أوقات ممكن ماتعرفش تتنفس.. وياريت تطلع بول كتير عشان كلاويك ماتبوظش ..وحاول ماتنزفش كتير ..وماترجّعش..واوعى يجيلك جلطات ..ولو قلبك وقف اشخط في الجراح عشان يبطل شغل ..أدوية الانعاش عندك في الدرج اللي وراك ,وجهاز الصدمات برة انده بسرعة على حد يجيبهولك ..ولما تخلص كل دة ..ابقى اندهلي عشان اقولك حمد لله على السلامة
أو...ممكن حضرتك تسمع كلامي ومش هخليك تحس بالراجل الوحش اللي بياكل العيانين ..ايه رأيك؟
متهيألي شكة الكانيولا ارحم..مش كدة؟!
..
10- تجنب الشجار وحوادث الطريق
ابعد عن مناطق الكوارث .. الزحام..التكاتك .. خطوط السكة الحديد ..الثكنات العسكرية ..الكباري العلوية ..العبوات الناسفة.. عربيات الكارو .. حرامية الطريق الدائري .. سقف بيتكم لو ساكن في (منطقة محظورة) .. تجنب ظباط الشرطة والمواطنين الشرفاء و سواقين خط الطالبية -هرم ..دة افضل من انك تتعور بمطواة او طلق ناري وتحتاج تعمل عملية طارئة لاقدر الله
ماهو الوقاية برضه خير من العلاج

دمتم بلا ألم