ربنا يكون فى عونهم

[Rena Jesus]

ربنا يكون في عون الناس اللي بيعانوا من الOverthinking .. اللي بيسكتوا أكتر ما بيتكلموا وبيتنّحوا في طرف ملاية السرير ورجل الكرسي.
اللي بيحرّكوا صوابعهم كتابة لكلام بيدور في دماغهم على أقرب سطح ايديهم تتحط عليه.
اللي على طول جواهم دوشة والدنيا حواليهم سكوت.
اللي بيسرحوا بالساعات في كلمة اتقالت قدامهم في دقيقة "صدفة"
اللي بيعمّلوا في دماغهم قصص وأساطير من موقف حصل مكنش مقصود بيه حاجة،
اللي مابينسوش تفاصيل مهما كانت صغيرة وبيربطوا أحداث مالهاش علاقة ببعض عشان تعمل في دماغهم قصة عظيمة هما بس اللي عارفينها.
اللي الحاجة اللي بيحبّوها مابينسوهاش مهما اتلهوا وبتفضل زى خلفية كده ورا خانات تانية مفتوحة في دماغهم كتير.
اللي المواقف والنسيان والفرحة والزعل عندهم ملهومش علاقة بالوقت مهما طال أو قصر.

الناس اللي بيراقبوا حركات الناس وعيونهم وهما بيتكلموا،
اللي ورقهم بالكوم فيه كلام مايتعدّش هما نفسهم مايعرفوش اتكتب ازاى !
اللي بيكلّموا نفسهم كتير وبيسكتوا مع غيرهم أكتر.
اللي بيبنوا فلسفات ونظريات عن الحياة محدش يعرفها غيرهم
واللي بيتأثروا بحاجات تافهة لمجرد انها ارتبطت عندهم بتفاصيل عظيمة مرتبطة بشعور معيّن محدش برضو يفهمها غيرهم.
اللي بيردوا على الناس في دماغهم وأحياناً بينسوا يردوا في الواقع.
اللي بتبدأ عندهم الفكرة من "الثورة" وتنتهي بيهم للون البلوزة اللي كان لبسها الشخص الفلاني من سنتين.

أكتر ناس اتقالّهم "مالك" وأكتر ناس قالوا "مفيش."
الناس اللي الكلام عندهم ليه صدى أعلى من الحروف، والتفاصيل عندهم أهمّ من المواقف نفسها،
اللي بيسرحوا في نبرة الصوت وحركة الجسم ونظرات العيون.
اللي بيعيّطوا، بيتعبوا، بيكتبوا كتير بس في الواقع هما ساكتين!
ربنا يكون في عونكم ومايشيّلكوش فوق طاقتكم ويرزقكوا باللي يفهمكوا وانتوا ساكتين ويكمّل فراغاتكوا وعلامات استفاهمكوا .. عشان انتوا ناس -مهما بتتعب- عظيمة، أوي!

وعلى فكره كلنا نفس النوعيه دى كلنا بنتعب قوى من جوه ومن بره بنبقى (ياجبل ما يهزك ريح )