سر ضحكة الطفلة «سمر» في إعلان «ارسم قلب»

[Mary Naeem]

سر ضحكة الطفلة «سمر» في إعلان «ارسم قلب»

أثار إعلان مؤسسة مجدى يعقوب لعلاج أمراض القلب "ارسم قلب" ضجة واسعة عبر مواقع التواصل الإجتماعى بعد أن لمس قلب الجميع بمشاركة الدكتور مجدى يعقوب عدد من أشهر الفنانين في الإعلان، والذي تبرع جميع العاملين عليه بأجورهم.

لكن لم يكن هذا الجانب الإيجابى الوحيد لتلك المؤسسة العريقة وهو ما رواه الصحفى بجريدة القاهرة "سامح فايز" عبر صفحته على موقع التواصل الاجتماعى "فيس بوك": قائلا: "بخصوص إعلان مجدى يعقوب ورسم القلوب، اللي في الصورة دي اسمها سمر، عارفين إيه السر ورا ضحكة سمر في الصورة وهى بتبص لأيديها، للأسف رغم إنى خصصت لسمر فصل في كتاب "‫‏رحلة يوسف"‬ اللى هيصدر عن ‫"دارالكرمة"‬ أول يوم العيد إلا إن سر الضحكة دى ملحقتش أحطه في الكتاب".

وأضاف: "سمر طفلة يتيمة الأب والأم من يوم ما اتولدت، في شهورها الأولى الدكاترة في وزارة الصحة اتعاملوا معاها على إن موتها مسألة وقت بسبب مرض شديد في القلب، مسئولة الأيتام في جمعية رسالة اللي تسلمتها من الوزارة بتحكي عن سمر إنهم حاولوا منعها من استلامها لأن موتها من وجهة نظرهم حاجة حتمية والأولى تاخد طفل غيرها، لكنها بتحكي إن كان في شيء غريب بيدفعها تجاه سمر.

واستطرد قائلا: "سمر في أول سنة من عمرها أجرت أول جراحة في القلب، في عامها الـ 3 أجرت تاني جراحة، وفي عامها التاسع أجرت تالت جراحة في مستشفى الدكتور مجدي يعقوب، تاني يوم للجراحة سمر جالها جلطة نتج عنها تسمم كامل في الدم، الكل قال خلاص سمر هتموت، بس سمر عاشت، لكن اضطروا لبتر أطرافها، الطبيب المسئول قال: إن الأمل الوحيد لتجنب البتر هو إنهم ينقلوا ليها دم من والدتها! اللى مكنتش موجودة للأسف.

ويقول: لما سألت سمر عن سر ضحكتها اللى مش بتفارقها قالت:"ربنا عايز كده"، وقالت إن جزء منها سبقها للجنة"، ويضيف: "قابلت سمر في رحلتي اللى زورت فيها مستشفيات ومراكز صحية في قرى الصعيد عشان كتاب رحلة يوسف، شوفتها في مؤسسة مجدي يعقوب ولفت انتباهي ضحكتها اللى مش بتفارقها أبدا، للأسف معرفش ايه اللى حصل شغلني عنها ورجعت القاهرة من غير ما أعرف قصتها".

ويستكمل قصة سمر قائلا: "الصدفة وحدها كانت سبب في إنى أوصل لمكان سمر في القاهرة عن طريق كفيل سمر، ورغم إنى كنت انتهيت من الكتاب لكن عملت تعديلات في اللحظات الأخيرة عشان أضيف فصل أحكي فيه حكاية سمر، وبسببها قررت إن نص أرباح المؤلف من الكتاب تروح لمؤسسة مجدي يعقوب، والسبب مش مجرد إنهم عالجوا سمر من غير واسطة ولا محسوبية ولا انت بنت مين في مصر وما بصوش لأنها نزيلة دار أيتام، لكن الإنسانية في المؤسسة دى وصلت لدرجة إنهم قرروا يركبوا طرف صناعي لسمر على حساب المستشفى، سمر سافرت إنجلترا بعد رمضان اللى فات وعملت عملية كلفت 2 مليون جنيه دفعتهم مؤسسة مجدي يعقوب بالكامل، والصورة دى لسمر في لندن وهى بتشوف أطراف ايديها سليمة لأول مره بعد عملية البتر".