سؤال للشباب ..هل تقبل أن ترتبط بفتاة لها ماضي ؟

[Mary Naeem]

سؤال للشباب ..هل تقبل أن ترتبط بفتاة لها ماضي ؟

الحب في مجتمعنا الشرقي له حسابات أخرى خاصة من الرجل ، فالرجل احياناً في هذا المجتمع يحاول أن يبحث عن فتاة ليس لها ماضي مما يجعله يثق في زواج الصالونات أكثر ، ولكن الحب ليس جريمة ، فهل تقبل أن تتزوج بفتاة كان لها ماضي من قبل ؟

هذا ماتقع فيه البنات من حيرة فهل تكذب اذا سألت عن ماضيها وتقول "ليس لي ماضي" ، أم تكمل مسيرة حياتها بالصراحة وتتحمل العواقب ?
يقول سامر :"أحببت فتاة منذ عام تقريبا ومتفقين لأبعد الحدود في بداية علاقتي معها سألتها عن ماضيها وقلت لها أنه لا يوجد لدي أي مشكلة إن كانت لها علاقات حب عفيفة ولكن حرصت على أن لا يكون لها أي علاقة جسدية لرغبتي بالارتباط بإنسانة تشبهني" .
ولكن بعد تعلقي الشديد بها وعزمنا على الارتباط اعترفت لي أنها كانت على علاقة جسدية عندما كانت في الجامعة علما أني أكدت كثيرا على هذا الموضوع في بداية علاقتنا وكانت تنفيه نفيا قاطعا وانا الان محتار فأنا احبها جدا ولكن لا استطيع نسيان خديعتها لي مشتت الذهن والمشاعر
ويقول شريف عبد المنعم "أكيد أقبل لو كان الماضي ده مثلاً جواز شرعي و ما حصلش نصيب مثلاً وطلقت بسبب عدم توافقها مع الشخص الأخر، أو لو كان الماضي ده علاقة عابرة في حياتها ماسبش عندها أي أثار ممتدة المفعول وبالتالي أقدر أنسيها كل اللي كان قبلي لكن لو كان الماضي ده فيه اي نوع من الانحلال الأخلاقي فده حيخلي موضوع الارتباط بيها غير وارد تماماً".
واختلف معه عمر مخلص فقال "أوافق طبعاً، طول ما أنا مكنتش في حياتها الفترة دي".
وقال محمد سليم " خطيبتي كانت مخطوبة لحد قبلي ومحصلش نصيب فمكملوش.. وبقالنا نصيب مع بعض".
ورد هاني علي قائلاً " عادي.. لو كانت مخطوبة ومحصلش نصيب مثلاً، لأن كل حد معرض أنه يختلف مع الطرف الأخر".
أما هشام محسن وقال " مفيش مشكلة.. لأن اللي بيفكر في الارتباط مرة ثانية بيكون أكيد نسي التجربة السابقة وعايز يبدأ صفحة جديدة.. ولو مكانتش نسيت اللي فات مكانتش فكرت في غيره".
فقالت صفاء سليمان " مفيش ولد يقبل يرتبط بواحدة كان عندها ماضي ، والفئة اللي بتقبل أنها تتجوز واحدة ليها ماضى قليلة جداً، وعلشان كدة الكذب بين المرتبطين زاد بطريقة مستحيلة لأن البنات دايماً بيخافوا يقولوا الحقيقة وبيكدبوا علشان اللى بيحبوه ميبعدش، ودة للأسف السبب فى فشل علاقات كثيرة "لأن ما بني علي باطل فهو باطل"، والعلاقة اللي بتبدأ بكذب عمرها ما تنتهى نهاية سعيدة، لأن دايماً الطرف الثانى بيكتشف الحقيقة أو على الأقل مش بيبقى فيه صراحة متبادلة فى العلاقة وده برضه بيأدى لفشلها".
أما فاطمة فقالت" الأولاد بيموتوا فى الكذب يحبوا أوى أن البنت تخدعهم وتقول أنه أول راجل فى حياتها،علي أساس الدستة اللى عرفتهم قبله رجالة من صنف تانى، والرجالة السبب فى كدة
طب مثلاً ولد خدع بنت بحجة انه بيحبها وأن الظروف مش مسهلة انه يتقدم لها، والبنت ذنبها إيه.. بجد حرام تظلموا البنات".
ووقعت هبه أحمد في الحيرة وقالت " بصراحة مش عارفة البنت تقول ولا لأ، مش حابه أن علاقة الجواز تبتدي بكذب.. وفي الوقت نفسه في رجالة بيفكروا بطريقة وحشة أوي ومش بيقدروا.. بس أنا عن نفسي لو عندي حاجة مقدرش أخبيها".
ويبقى السؤال المحير هل تقبل أن ترتبط بفتاة لها ماضي ؟