انا فيا شبه من حكايات كتير اتحكت في كتابك المقدس ياربي .. فيا شبه من يوسف لما أخواته باعوه .. لما بيبعد عني كل حبيب وصديق .. لما بيخوني كل حد قربت منه وبيخزلني بمواقف صعبة بتجرح في قلبي .. لما بيتخلي عني كل حد إلا انت يا يسوع ..
انا فيا شبه من موسي لما فكر انه ممكن بقوته يدافع عن شعبك و غلط وقتل وهرب و نسي شعبه و راح بعيد .. كان فاكر ان حكايته خلصت هنا وسط صحرا و كام غنمة لكنك دعيته علشان يخدمك .. و برضو انا كنت شبهه لما رفض يخدمك .. دايما فاكر نفسي يا اما أقوي واحد واقدر اغلب لوحدي او ببقي فاكر نفسي اضعف ضعيف و مهزوم من ضعفي و همي .. دايما ناسيك و حاطط بس نفسي قصاد عينيا ..
انا شبه ايليا لما خاف من تهديد إيزابيل .. انا شبه بطرس لما أنكرك و كان فاكر انه اكتر تلميذ حبك .. انا شبه توما لما شك فيك و شبه شاول الطرسوسي لما كان بيقتل باسمك و بيدافع عنك بغيرة عامية .. انا فيا شبه من كل دول ومن غيرهم كمان كتير .. جوا نفسي الف مرض و الف عيب ..
نفسي ابقي في مرة شبهك .. تتغير كل صفاتي لصفات ترضي قلبك .. يتصلح كل عيب و يتشفي كل مرض ويتكمل كل نقص .. نفسي ابقي كُلّي انت ...
بقلم : ماريان عادل
21 - 01 - 2015, 08:56 PM
العرض الشجري