وقال سلطان في تدوينة علي الفيس بوك كتبها بطريقة "الإسقاط" : كان العرق يتصبب من جبين الإعلامى الشهير بغزارة ، على الرغم من أنه مستلقى على الشيزلونج أمام حمام السباحة بفندق الفورسيزون ، يعلو صوته فى الهواء ، فين الثورة ؟ النهردة الجمعة ياناس مفيش أى حاجة ، هنشتغل ازاى ، باين عليه أسبوع مضروب ، ردت زوجته بهدوء ، ريح نفسك ياحبيبى ، أهم حاجة أعصابك ، هو انت مسئول عن الكون ، كفاية انك عملت ثورة يناير ، هتعملهم ثورة تانية ، لازم الشعب يتعلم ويشتغل لوحده ، وبعدين أنا عندى شك إن فيه خيانة وفيه قبض وفيه عمالة .. وعلى الرغم من أن الصحفى الواثق كان يسبح بالمايوه الفتلة ذهابا وإيابا ، إلا أنه أخرج رأسه من تحت الماء وقال ، كلام زوجتك صح وعندى ١٤وثيقة تؤكد أنه حدث اختراق لجبهة الإنقاذ ولقيادات العمل الوطنى الجبهوى الوحدوى فى بورسعيد والمحلة والمنصورة ورابطة اتحاد ملاك كوبرى قصر النيل .. لم يلتفت الإعلامى إلى كلام الصحفى ، واكتفت زوجته بهزة رأس مجاملة ، ورمقت أعينها رسالة على المحمول تفيد أن عدد التوكيلات التى تم تحريرها حتى الآن بلغ ٢٦٤ توكيلا على مستوى الجمهورية ، فألقت بالمحمول ، وقالت : هى جبهة الانقاذ هتودينا فين ؟ ليه كل مايمشوا فى موضوع يفشل ؟ فين ملايين التوكيلات اللى وعدونا بيها ؟ دا أنا عملت حلقة تاريخية مع أستاذ الأساتذة وأقنع الملايين ، كعادته من أيام هزيمة ٦٧ ، بحتمية الحل الاشتراكى العسكرى ، والناس خلاص مستنية إشارة .. كان الإعلامى قد أخذته سنة من نعاس خفيف ، استيقظ على كلمة إشارة ، فضرب برجله بعنف ، معتقدا أنها إشار مرور تلزمها فرامل ، فانهارت المنضدة بما عليها من طيب الطعام والشراب ، وأخذ يردد كلمة إشارة إشارة .. شارة شارة شارة .. وقال بصوت خفيض بعيدا عن أذن الصحفى السابحة : لازم يازوجتى العزيزة نغير ، لازم نتغير ، لازم ندرك الواقع ، فكك من الانقاذ وسنينه ، لازم نخلع منهم ، واوعى تعملى حساب لكلام الناس ، الناس هتنسى زى مانست موقفنا من الثورة ، وبعدين دى إشارة من ربنا وجتلى وأنا نايم وكله كان أدامك .. ردت زوجته : طالما الموضوع كدة ياحبيبى يبقى لازم نبدأ بعمرة علشان ربنا يبارك لنا ويتقبل منا العمل الوطنى الجديد ! قال الزوج أوكى ، بس ليه مفكرتيش فى الحجاب ؟ ردت ، كدة علطول تبقى واسعة ، خلينا خطوة خطوة ، وبمجرد خروج الصحفى مبتلا ألقى الزوج فى وجهه بالفوطة وقال : نشف روحك من الوثائق ياجامد ..ودارى المايوه الفتلة .. ومن هنا ورايح لازم تخليه شرعى ..
15 - 03 - 2013, 12:46 PM
العرض الشجري