من هو بابا نويل ؟؟
هل اسمه بابا نويل ام سانت كلوز ام القديس نيكولاس ( نيقولاوس ) ؟؟
وهل قصة حياته أسطورة أم واقع ؟؟
ولماذا ارتبطت بعيد ميلاد السيد المسيح ؟؟
وما هذه الملابس التي يرتديها ؟؟
ولماذا نراه أحيانا يركب حمارا وأحيانا مركبة تجرها الغزلان ؟؟
إن بابا نويل هو شخصية حقيقية وربما يتعجب البعض عندما يعرف إن الكنيسة القبطية تحتفل بعيد نياحته في العاشر من كيهك ..؟؟ هو القديس نيكولاس أسقف مورا بآسيا الصغرى في القرن الرابع الميلادي
كان من مدينة مورا .. ابوه اسمه ابيفانس وامه تونه ..وكانوا اغنياء اوي بجانب كل ده كانوا بيخافوا ربنا جدا وبيطعوه في كل حاجه ومكنش عندهم اولاد يورثوهم لدرجة انهم يأسوا ولكن ربنا كان اقوي من يأسهم واعطاهم الطفل نيكولاس ( بابا نويل )
كان شاطر جدا وروح ربنا ساكنه فيه
وبعد كده بقي شماس ثم راهب ثم رسم قس وهو عنده 19 سنة
وربنا اداله نعمة كبيرة قدر من خلالها انه يشفي المرضي ويعمل المعجزات
وفي مرة كان فيه راجل غني فقد كل ثروته وكان عنده تلات بنات
وكان عايز يجوزهم ولكن مش معاه فلوس .. لدرجة انه فكر انه يشغلهم في حاجات تغضب ربنا علشان يجيبوا فلوس كتير يقدروا يساعدوا ابوهم
ولكن ربنا عرف القديس نيكولاس ( بابا نويل ) بالكلام ده
راح بابا نويل خد من فلوس ابوه وامه 100 دينار ورماهم جوه الشباك بتاع بيت الراجل ده
وفرح اوي الراجل ده لما لقي الفلوس وقدر يجوز بنته الاولي
والعملية دي اتكررت فيه تاني وقدر يجوز بنته التانيه
الراجل طبعا كان عنده فضول انه يعرف من اللي بيعمل كده
وفضل سهران جنب الشباك علشان يشوف مين بيحدف الفلوس
وفضل يراقب بهدوء لحد مالقي في حد بيقرب من الشباك
واول مالكيس اللي فيه الفلوس اتحدف
راح الراجل نط من مكانه عشان يجري يشوف مين بيعمل كده
لقي نيقولاوس ( بابا نويل )
راح شكره جدا فقاله متشكرنيش انا بل اشكر ربنا
ولما اسقف مورا تنيح ربنا ارشد رئيس الأساقفه انه يرسم القديس نيقولاوس مكانه وعرفه قد ايه الراجل ده قديس عظيم
وفي حكم الملك دقلديانوس ..سمع ان الراجل ده قديس وبيعبد المسيح وطبعا دقلديانوس ده كان بيعبد الأوثان ومكنش بيحب اي حد بيبعبد ربنا
راح قبض عليه ورماه في السجن وعزبه كتير ولكن ربنا كان بيقف جنبيه في كل العزابات ويخفف عنه
ولما كان نيكولاس في السجن كان بيكتب للشعب علشان يطمنهم ويقويهم
ولما دقلديانوس مات وجه مكانه قسطنطين الملك البار افرج عن كل المساجين وكان من بينهم نيكولاس .. ورجع بعد كده لكرسيه
ولكنه اتسجن تاني لما كان حاضر مجمع نيقيه علشان معجبوش كلام اريوس وراح ضربه بالقلم علي وشه
ولما نيقولاوس ضرب اريوس راح كل الناس غضبت من تصرفه وراحوا سجنوه ولكن ربنا كان معاه وخرجه تاني من السجن
وفي مرة كان الحاكم يوستاثيوس اللي كان موجود في عهده اخد رشوه علشان يحكم علي تلاته ابرياء بالقتل ولكن القديس نيقولاوس شل ايد السياف قبل ماينفذ الحكم
وعمل اكتر من معجزة تانيه وساعد كتير من الفقراء
فكل ثروة اهله كان بيساعد بيها كل المساكين والمحتاجين وعمره متأخر عن حد
وتنيح وهو عنده 80 سنة منها 40 سنة اسقف
واتدفن في كاتدرائية مورا اللي كان اسقف عليها
ايه سر ارتباط الهدايا بيه ؟؟
لانه كان بيساعد الناس في الخفاء
طيب ليه سموه بابا نويل
لأن بابا نويل تعني في الفرنسية اب الميلاد ولذلك ربطوه بعيد الميلاد
وموضوع صوره اللي راكب فيها علي حمار وصورة التانيه اللي راكب فيها عجلة تجرها الغزلان
فدي مجرد رسومات مختلفه .. فكل بلد كانت تنسب اليها بابا نويل وتقوم برسمه بطريقة معينه علي حسب خيالها الإجتماعي
وتم رسم اكثر من صورة ليه بملابس مختلفه ولكن الزي اللي اشتهر في كل بلاد العالم هو الثوب الاحمر والجزمة السوداء اللامعه والذقن البيضاء اللي اترسم في سنة 1881
علي يد رسام امريكي
