الخادم الاليكتروني "أفكارعملية للخدمة الكنسية"

[Marina Greiss]

مع انتشار وسائل التكنولوجيا الحديثة وتوغلها في الخدمة، بقى كل واحد عايز يتكلم في الموضوع ده بيكتب الجملة الشهيرة ان التكنولوجيا "سلاح ذو حدين ولازم نستخدمها كويس وصح وإلا بقت شيطان"

أولا كل المخدومين دلوقتي موجودين على الفيسبوك، وعندهم موبايلات.

١- الفيسبوك:

+ ممكن تعمل جروب لأسرتك وده معظم الناس فعلا عاملاه. المهم مش انك تعمله، ومش انه يبقى وسيلة اتصال فقط و وسيلة لترتيب مواعيد الأنشطة وغيره، لكن مهم كمان انك تحط عليه السنكسار مثلا بصفة دورية، وألحان وترانيم وآيات، وتتكلم عن مناسبات الكنيسة، وتكون مخصص وقت لأنك توصل للمخدومين عن طريق الفيسبوك من خلال الرسائل أو الجروب.

+ ممكن كمان تبدأ تعمل لهم مسابقات على جروب الفيسبوك وأنشطة وتسالي خصوصا في فترة الصيف.

٢- الموبايل:

+الخدمة الفردية عن طريق الموبايل. دلوقتي الحمدلله في باقات رسائل مثلا ١٠٠٠ رسالة ب ١٠ جنية من موبينيل لو انت على نظام ستار، وأكيد في انظمة مشابهة في فودافون، ممكن تبعت كل كام يوم كده رسالة فيها آية حلوة معزية للمخدومين وكمان الخدام اخواتك. ليه دي خدمة مهمة أكتر من الفيسبوك؟ لأكتر من سبب:

- المخدوم بيحس ان الخادم فاكره بصفة شخصية، وإن ربنا باعتله كلمة سلام هو محتاجها في الوقت ده، وان كلام ربنا فعلا بيبقى سنده وتعزيته فيبدأ يتعود على انه يترمي في حضن ربنا في كل الاوقات. كمان انت كده بتقلل عدد مرات الافتقاد اللي انت محتاج تعملها للمخدوم لأنك طول الوقت باستمرار فاكره ومعاه ع الخط!

+ مهم جدا انك تكون عارف جدول امتحانات مخدوميك وتبعت لهم الرسايل دي ليلة الامتحان، بتفرق جدا على فكرة، أكتر مما تتخيل. ساعتها انت كخادم بتكون فعلا جسر لمخدوميك تجاه ربنا ومحبته.

- مهم تكلم مخدوميك في التليفون بعد الامتحانات تسأل عليهم، كان في خادمة صديقتي راحت السما، ماريانا ملطي، كانت بعد كل مادة في ثانوية عامة بتكلم البنات في التليفون، لغاية اخر وقت في حياتها على الأرض.

+ طب لو عندك مخدومين كتير في الاسرة أو الحالة الاقتصادية مش ماشية وصعب انك تعمل ده؟ ممكن باشتراكك مع الخدام اللي معاك تنسق انكم تجمعوا تكلفة الرسايل دي من بعض أو انكم من عشوركم حتى تعملوا ده، دي خدمة قد ايه مثمرة. موضوع الرسايل ده مهم جدا وأكرر، وخصوصا ايام الامتحانات.

+ الملاحظة الهامة ان من فترة كده كان ممكن تعمل اكاونت على تويتر والناس تعمل له فولو من الموبايل ولما تكتب على تويتر الرسايل توصل لهم ببلاش على تليفوناتهم، بس الموضوع ده توقف من كل الشبكات وكان عيبه كمان ان اتصالات مكانتش في الحسبان خالص.

+ في مخدومين كتير دلوقتي بقى معاهم سمارت فون، وعندهم واتساب watsapp وفايبرviber، طبعا ممكن ساعتها توسع اكتر دايرة رسايلك وتبعت مش بس ايات مكتوبة، لكن كمان صور قديس اليوم، ترنيمة، لحن، ومايمنعش يعني نكتة ولا أي حاجة دمها خفيف، مش لازم الخادم يبقى مقفل يعني طول الوقت.

٣- التدوين:

+ لو انت بقى فاضي شوية وعندك وقت، ممكن تعمل مدونة، يعني موقع زي اللي بتقرا عليه دلوقتي، وده ببلاش، تعمل المدونة على واحد منهم. طبعا المدونة دي هاتبقى على مستوى الخدمة كلها، نقول مثلا كل أسر اعدادي، وطبعا في افكار ومواضيع لا نهائية ممكن تحطها على المدونة. ميزة المدونة انك هاتبقى بتخدم على نطاق أوسع والناس لما تدور على المواضيع على جوجل هاتوصل لمدونتك وكده تبقى خدمتك وصلت للعالمية الف مبروك يعني بتعمم الفايدة لناس كتير

+ ممكن تشارك خدام معاك في انكم تكتبوا على المدونة لو انت وقتك ضيق، وممكن كمان تعلم المخدومين طريقة استخدامها والكتابة عليها ، وهي سهلة جدا على فكرة مش محتاجة مهندس، ويدخلوا هما كمان يحطوا حاجات عليها بعد ما طبعا انتوا تراجعوها. انت كده بتشجعهم يبقوا خدام، وبتعلمهم روحيا واليكترونيا، وبتكتشف مواهبهم في الكمبيوتر والنت والكتابة والخ.

+ ممكن كمان تحط كل اسبوع على المدونة الدرس اللي بياخدوه، واللحن، وترانيم مدارس الأحد، بحيث ان اللي ماجاش يقدر يستفيد برضه ويتابع.

+ مثال لمدونة ناجحة جدا في الخدمة: مدونة ideas4servants.blogspot.com

+ تحديث: بعد ما كتبت البوست ده، في مبادرة قامت بنجاح من كنيسة مارمرقس - مدينة ١٥ مايو بعمل مدونة لخدمة ثانوي باحييهم جدا على سرعة التنفيذ والايجابية وارسالهم عنوان المدونة


٤- اليوتيوب:

+ ممكن تعمل أكاونت على youtube، وتصور وتحط عليه فيديوهات من عظات المؤتمرات في الكنيسة، ألحان وترانيم المخدومين بيحبوها، وممكن كمان انت تعمل فيديو لترنيمة جديدة عملتوها في كنيستكم، وتشجع كمان المخدومين انهم يعملوا فيديوهات على ال movie maker وترفعهالهم. وممكن كمان يتعلموا اكتر في عمل ومونتاج الفيديو ودي خدمة مطلوبة كتير اليومين دول في الكنايس.

+ ممكن تبدأ في تقسيم الفيديوهات في playlists يعني كل مؤتمر مثلا أو مناسبة ليها ليستة، بحيث تنظم الفيديوهات للمخدوملن وللناس كمان على اليوتيوب بصفة عامة.

+ المعروف ان اليوتيوب من أكتر المواقع اللي الناس بتستخدم البحث بتاعها، وبالتالي لما ترفع عليه أي فيديو، ماتنساش تكتب اسمه كويس، وتكتب في الوصف بتاعه كل الكلمات اللي ممكن الواحد يفكر فيها وهو بيدور على الفيديو ده، يعني مثلا لو لحن، تكتب اسمه عربي وانجليزي وتحط لينك لكلمات اللحن وتكتب المناسبة اللي بيتقال فيها اللحن ده امتى، عشان الناس تلاقي اللحن في البحث بسهولة وبسرعة.

+ بالنسبة للتدوين واليوتيوب، ماتنساش حقوق الطبع والنشر والملكية الفكرية، يعني ماينفعش تبقى خادم وبتسرق حاجات الناس (حصلت على فكرة معايا كتير، الناس خدت مني لحن اطاي بارثينوس على اليوتيوب ونزلته ورفعوه باسمهم تاني، ما علينا). فلو انت عملت فيديو لترنيمة من كورال أو البوم فريق، اتأكد ان اللي بيقول الترنيمة موافق على ده، او على الاقل تكتب اسمه في الفيديو. وماينفعش بأي حال من الأحوال تاخد حاجة حد عاملها وتنسبها لنفسك تحت شعار إن دي خدمة وانك بتساعد في نشر الحاجة دي، لأن الأمانة مهمة!

-------------------------------------------------

في أفكار كتير، ودي مجرد زي ما بيقولوا "tip of the iceberg" عشان تفتح لنفسك مجالات أكتر وأكبر للخدمة، وتكون خادم واعي ومؤثر بحق وحقيقي مش لسة شاغل بالك بمواضيع بدائية في الخدمة لا بتودي ولا بتجيب.

مش طبيعي انه يكون في القرن ال٢١ حد مايعرفش يستخدم النت، مش لازم تكون محترف، بس ع الاقل طور نفسك ومعرفتك، عشان مش منطقي ان مخدوميك يكونوا عارفين اكتر منك، ويحسوا انك رجعي وجاي من الفضاء.

مخدوميك لازم يشوفوك شخص ناجح وقدوة وذو علم ومعرفة مش بس روحية لكن كمان اجتماعية واليكترونية وفي كل المجالات. "ايها الحبيب اروم ان تكون ناجحا في كل شيء"

لازم انت تكون مليان عشان تقدر تملا اللي بتخدمهم، ولازم اكتر حاجة تكون مالياك هي محبة ربنا، لازم تحب ربنا جدا ويكون هو الهدف ونحوه عينيك وانت بتعمل كل ده، وإلا كل ده هايبقى تعب باطل ومالهوش أهمية.

اهم حاجة تعملها انك تصلي لمخدوميك، خدمة من غير صلاة مالهاش أي لازمة

وربنا يبارك كل عمل لمجد اسمه القدوس