|
 |
 |
 |
|
رقم المشاركة : ( 1 )
23 - 01 - 2026, 10:44 AM
|
|||||||||||
|
|||||||||||
|
يا جماعة، إحنا دايماً بنسمع إن البنت الرقيقة هي اللي بتخاف من الصرصار😂 وبتجري تستخبى ورا الباب..😂 بس الحقيقة اللي محدش قالها لكم إن البنات وقت الجد بيبقوا "كوماندوز"! 😂 يعني ممكن تلاقيها بتخاف من "نملة" بس وقت الأزمات بتتحول لـ بطلة خارقة. بتفكر وبترتب وبتاخد قرارات تغير تاريخ عيلة بحالها، لا وممكن بلد كاملة كمان.. والنهاردة بطلتنا هتثبت لكل الرجالة إن "النعمة" اللي في حياة البنت، لما بتجتمع مع ذكائها، بتعمل معجزات. تعالوا نعرف قصة واحدة من أشجع البنات اللي ممكن تسمعوا عنها في حياتكم، بطلة النهاردة هي: يَهوشبع (بنت الملك) البطلة اللي "خطفت" الحياة من وسط الموت، عشان تعلّمنا إن "النعمة" دايماً أقوى من "العاصفة" وإن الستر الحقيقي هو اللي بيجي من عند ربنا. بعد ما حكينا عن أبطال كتير، كان لازم نقف قدام الست الشجاعة دي (يهوشبع بنت الملك يُورام) الست دي كسرت حاجز الخوف، وأنقذت "وعد ربنا" من الإبادة في وقت كان الضلمة فيه محوطة كل مكان. الحكاية بدأت لما قامت "عثليا" الملكة الشريرة بـ "مجزرة" حقيقية، قررت تبيد كل النسل الملكي عشان تنفرد بالكرسي والحكم، والكتاب بيوصف المشهد الصعب ده ويقول:👇🏻 «فَلَمَّا رَأَتْ عَثَلْيَا أُمُّ أَخَزْيَا أَنَّ ابْنَهَا قَدْ مَاتَ، قَامَتْ فَأَبَادَتْ جَمِيعَ النَّسْلِ الْمَلِكِيِّ» (ملوك الثاني 11: 1) في وسط الدم ده، ظهرت "يهوشبع" يهوشبع مكنتش مجرد واحدة عادية، دي كانت بنت الملك، وعارفة إن غلطة واحدة معناها موتها. لكن "غيرة" قلبها كانت أقوى من خوفها من جبروت عثليا. يهوشبع "اتسحبت" في هدوء، وفي عز ما السيوف كانت شغالة ، عملت أسرع وأذكى عملية إنقاذ:👇🏻 «فَأَخَذَتْ يَهُوشَبَعُ بِنْتُ الْمَلِكِ يُورَامَ، أُخْتُ أَخَزْيَا ، يُوآشَ بْنَ أَخَزْيَا وَسَرِقَتْهُ مِنْ وَسَطِ بَنِي الْمَلِكِ الَّذِينَ قُتِلُوا» (ملوك الثاني 11: 2) يهوشبع مخدتش الطفل وهربت بيه بره البلد، ده هي استخبت في أكتر مكان "عثليا" متفكرش تدخله.. "بيت الرب". خبيته هو ومرضعته في أوضة "الأسرّة" وقعدت تراعيه وتربيه في السر لمدة ٦ سنين كاملة، والستر الإلهي كان محاوطهم:👇🏻 «وَكَانَ مَعَهَا فِي بَيْتِ الرَّبِّ مُخْتَبِئًا سِتَّ سِنِينَ. وَعَثَلْيَا مَالِكَةٌ عَلَى الأَرْضِ» (ملوك الثاني 11: 3) شوف بقي ربنا عمل ايه.... تعب يهوشبع وأمانتها مطلعش بلاش.. الطفل اللي خبته وكبرته في السر، جه اليوم اللي ظهر فيه للنور وبقى ملك عظيم، ورجع قلب الشعب لربنا:👇🏻 «وَعَمِلَ يُوآشُ مَا هُوَ مُسْتَقِيمٌ فِي عَيْنَيِ الرَّبِّ كُلَّ أَيَّامِهِ الَّتِي فِيهَا عَلَّمَهُ يَهُويَادَاعُ الْكَاهِنُ» (ملوك الثاني 12: 2) يهوشبع مكنتش بتدور على صيت، كانت بطلة ظل حقيقية حميت "ملك" ورجعت "عبادة" وأنقذت "مستقبل" أمة كاملة من غير ما تطلب كلمة شكر. طيب الحكاية دي بتقولنا إيه النهاردة في حياتنا؟ يهوشبع هي "بروفة" لكل حد فينا بيحس إن "الشر" صوته عالي ومسيطر. إحنا كتير بنخاف من المشاكل (العواصف) اللي حوالينا، وبننسى إن نعمة ربنا قادرة تسترنا وتخبينا في أوضة صغيرة بعيد عن عين أي عدو. بطولة يهوشبع بتعلمنا إن ربنا بيستخدم أمانة شخص واحد عشان يغير التاريخ. لما يهوشبع كانت أمينة في الستر ربنا كان أمين في الحماية. وده بيعلمنا إننا نكون "أبطال ظل" في خدمتنا.. نعمل الصح حتى لو في السر، ونحمي الضعيف ونشجع المكسور، لأننا مش عارفين الشخص اللي بنسنده النهاردة ده ممكن ربنا يعمله "ملك" إيه بكره. ربنا عاوز يقولك: "أنا شايف أمانتك في الخفاء، وسامع دقات قلبك الخايفة.. أنا اللي سترت يهوشبع ويُوآش، قادر أسترك وأحافظ عليك وسط عواصف الدنيا". عايزك تطمن.. ربنا لسه بيستر، ولسه بيحمي، وبيجهزك في "الخفاء" عشان تكون ملك في "النور". إنت مش منسي، وعملك الصغير ليه قيمة كبيرة في السما. 
|
| أدوات الموضوع | |
| انواع عرض الموضوع | |
|
العرض الشجري