اسكتش عيد الصعود
اهداف الاسكتش
1- معرفة الاطفال قصة صعود ربنا يسوع المسيح .
2- اهمية الصعود بالنسبة لينا .
بداية الاسكتش
يدخل بطرس الرسول يتحدث مع نفسه
بطرس الرسول: ياااه النهارده لينا 40 يوم بعد قيامة الرب يسوع وباين هيبقى يوم معروف النهارده ياترى هيحصل ايه
يخبط يوحنا على البااب
بطرس : مين بيخبط على الباب مين
يوحنا: انا يوحنا يا بطرس افتح
يطرس : حاضر انا جاى اهو
يفتح بطرس الباب ويدخل يوحنا
يوحنا: ازيك يا بطرس عامل ايه
بطرس : كويس يا يوحنا متعرفش انت عامل ايه
يوحنا: كويس يلا بينا عشان نروح نشوف التلاميذ
بطرس : هما موجدين فى العليه بيت مريم ام مرقس كلهم
يوحنا : ايوه ويمكن يظهر لينا الرب يسوع ويتكلم معانا على الامور المختصة بملكوت الله زى الفترة اللى فاتت ونشوفه ونقعد معاه
بطرس ايوه يلا صح يلا بينا
يخرج بطرس ويوحنا
يدخل بطرس ويوحنا ويدخل معاه باقى التلاميذ التسعه
بطرس : النهارده يا اخوتى الرب بيظهر لينا ويتكلم معانا وكلنا نؤمن انه قام من الاموات
يوحنا : ايوه اكيد قام واحنا شوفناه بيعوننا
يظهر ليهم السيد المسيح
السيد المسيح: سلام لكم
يوحنا : شايف يا بطرس الرب هناك اهو جاى علينا
بطرس : ايوه سلام يا معلم
السيد المسيح: تعالوا يا اولادى النهارده هنروح عند جبل الزيتون وتقعدوا معايا شويه
بطرس ويوحنا : ايوه كلنا جايين معاك يا رب
يخرج الجميع ويدخل السيد المسيح ومعه التلاميذ ويمكن عمل صخرة من الكرتون على هيئة جبل
السيد المسيح : احنا ادينا وصلنا جبل الزيتون عايزكم يا حبايبى محدش يمشى من اورشليم دلوقت وتقعدوا هنا فى اورشليم
بطرس : ليه يارب
السيد المسيح : عشان عايزكم تستنوا وتنتظروا موعد الاب اللى سمعتموه منى عشان يوحنا عمد بالماء بس انتوا هتتعمدوا بالروح القدس قريب خالص من الايام دى مش هتاخر عليكم كتير
التلاميذ مع بعض: هل دلوقت يارب هترد الملك لإسرائيل ولا ايه
السيد المسيح : مش لازم تعرفوا الوقت والزمان اللى جعله الاب فى سلطانه بس اما يحل الروح القدس عليكم هتنالوا قوة كبيره خالص وهتبقوا ليا شهود فى اورشليم واليهودية والسامرة وكل حتة فى كل الارض
يبدا السيد المسيح فى الخروج وينظر التلاميذ للسماء
بطرس : بص بص يا يوحنا المعلم صاعد للسماء بص
يوحنا : ايه ده ايوه صح ده هيختفى فى السحابه
ثم يختفى عن عيونهم
يوحنا : ياااه السيد المسيح ليه معانا اربعين يوم بيظهر لينا والنهارده رحنا ادينا معاه جبل الزيتون وصعد للسماء ياترى ايه اللى هيحصل دلوقت
بطرس : مش عارف هنشوف يا يوحنا
يظهر ملاكان ليهم لابسين ابيض
يوحنا : بص بص يا بطرش شايف الاثنين اللى ظاهرين دول لابسين ابيض
بطرس : ايوه ياترى دول مين
الملاكان: يا ناس يا اللى من الجليل باصين ليه كدا على السماء يسوع اللى ارتفع وراح السماء هيجى تانى زى ما انتوا شفتوه صاعد للسماء كدا
ثم يخرج الملاكان
بطرس : ياااه شفت يا يوحنا دول اختفوا عننا ومشيوا
يوحنا : ايوه يا بطرس طيب هنعمل ايه دلوقت
بطرس : احنا هناخد باقى التلاميذ ونرجع نقعد فى بيت مريم ام مرقس فى العليه ونستنى زى ما الرب يسوع قال لينا
يوحنا : نعمل كدا يعنى
بطرس : ايوه لازم نسمع كلام السيد المسيح وانتوا كمان يا اصحابى لازم تسمعوا كلام بابا وماما فى البيت وكمان فى الكنيسة تسمعوا كلام الخدام ومحدش يعمل هيصة ونقف كويس فى التناول ونحترم بعض ومش نعلى صوتنا على اكبر مننا ونبقى حلوين عشان بابا يسوع بيحبنا خالص اما نسمع الكلام ونبقى حلوين كدا يلا بقى هنروح بيت مارمرقس يلا سلام يا اصحابى
سلام سلام ويخرج الجميع
اسكتش لعيد حلول الروح القدس
تمهيد الاسكتش
التاسوني: فيه حد يقدر يلعب بنار الكبريت اللى عند ماما فى المطبخ لا طبعا دى بتلسع
طيب فيه حد يقدر يلعب بنار البوتوجاز لا طبعا دى مصيبة و ايدينا هاتتحرق
يعنى ما نلعبش ابدا بالنار لانها حاجة مش امان ...اوعوا
انهاردة حكايتنا عن نار ...لكن نار من نوع تانى خالص .. يالا نسمع الحكاية
يدخل بطرس و يوحنا و يعقوب و مرقس و توما و فيلبس
بطرس ينادي عليهم و يقول : احنا ﻻزم نعمل بوصية ربنا و نبشر جميع الناس باسم الرب يسوع في كل اﻻرض
يوحنا : طبعا طبعا ﻻزم نعمل كدة بعد ماحل علينا الروح القدس يوم ال50 انا ﻻزم اكلم كل الناس علشان تؤمن بالرب يسوع
فيلبس: ايوة انا فرحان اووووي ... يومها كنا كلنا في اورشليم متجمعين بنصلي في العلية مع بقية التﻻميذ و سمعنا صوت عجيب اوووي
مرقس : ايوة كان صوت رياح عظيمة قوي ... ولقينا السنة من نار وقفت فوق راس كل واحد فينا ... نار قوية بس ما بتلسعش و لا بتحرق الشعر
توما : بعدها على طول كل واحد فينا بقى بيتكلم لغة غير التانى خالص
يعقوب: واحد بيتكلم مصرى و واحد بيتكلم ايطالى و واحد بيتكلم يونانى و واحد تانى بيتكلم هندى و و احد تانى بتكلم صينى و لغات كتيرة اوي كل ده بسبب السنة النار
بطرس: عارفين احنا متعلمناش اللغات دي... النار اللى كانت فوق راسنا هى اللى علمتنا ...والنار دى اسمها ( الروح القدس) .... و هي دى الهدية اللى يسوع اداها لكل التﻻميذ .
مرقس عشان بيتكلم قبطى ( مصرى ) راح يبشر فى ارض مصر و توما راح الهند و بولس راح روما وهي دي هدية الرب يسوع لينا
يوحنا: و انت يا بطرس بعدها وعظت الناس في اورشليم و ناس كتير امنوا ووصل عددهم 3 اﻻﻻف نفس و بعدها كل واحد فينا راح يبشر باسم الرب يسوع وهي دي فعﻻ هدية الرب يسوع لينا
التاسوني: انتوا كمان عايزين هدية زى اللى اخدها التلاميذ من بابا يسوع ؟؟؟
انتوا معاكوا الهدية فعلا ...
اول ما بنتعمد ابونا الكاهن بينفخ فى وشنا عشان يدينا هدية الروح القدس ... و عشان نار الروح القدس جوانا ما تنطفيش بنروح الكنيسة ونتناول و هي تقوى و تتجدد من تانى ....يالﻻ نحفظ اﻻية مع بعض
اﻻية " تقبلوا عطية الروح القدس" اعمال 2 : 38
