خلوا ليئة تعرف انها جميلة

[walaa farouk]

أِكيد البنتين كانوا بيحلموا بيوم الجواز...
بيحلموا يكون لكل واحدة بيت ومملكة خاصة بيها..
لكن اللي حصل أنهم راحوا على نفس البيت😢.. بيت يعقوب..
الحكاية ما بينهم مش ناقصة يبقوا ضراير💔

قلبي وجعني عليكي يا ليئة🥹
انت اتحملتي مشاعر مؤلمة من المقارنة طول عمرك.
. الكل شايف راحيل وانتِ مش متشافة..
يمكن كان نفسك تسمعي من أبوكي
"انت مميزة يا بنتي في وسط بنات حاران"..
كان نفسك حد يشوف جمالك الداخلي ويقدر انك اتحملتي وعيشتي..

لكن للاسف كل اللي كان بيتوجه لك "انت اوحش من أختك
.. انت شيش بيش ونظرك ضعيف"..
اكيد سمعتي طنط فلانة وطنط علانة وهما بيشكروا
في شكل الهدوم الجديدة على راحيل ويتغزلوا في حلاوتها🥺
مفيش حاجة تبل ريقك يا مسكينة
..ده حتى معنى اسمك مكانش في صالحك "البقرة المتوحشة"..
واللي زاد وغطا يوم فرحك.. اليوم اللي كل بنت بتتمناه..
ومشهد اكتشاف يعقوب أنك مش راحيل...
ايه الكسر والظلم والوجع ده💔💔
ازاي قدرتي تكملي اليوم ده..😰

في كل الوجع والمقارنة اللي مش بتخلص الله ميزك
وفتح رحمك واداكي نسل وباركك بأولاد وعوضك☺️

النهاردة لكل أب وأم .. لكل راعي.. لكل اخ أكبر..
لكل مُدرسة ساعدونا نحرر كل ليئة من المقارنة..
خلوا ليئة تعرف انها جميلة قالبًا ع الأقل..
خلوها تصدق ده عشان بعد كدة تشوف جمالها الخارجي..

لكل واحد محطوط في مقارنة، معافرتك
عشان تشوف صورتك الحقيقية متقدرة، كمل💪🏻
باصلي أن ربنا بنفسه يعوضك ويفرحك يا أجمل خليقته💜