الإحتواء !

[روشا الفرفوشه]

لما شخص مهم ليك (قريبك,صديقك, شريك حياتك) يجى يفضفض معاك أو يشكيلك همه (ودى حاجة مهمة جدا على مستوى العلاقات وامتياز ليك)
او حتى شخص افتراضى على النت كتب موضوع عن كسره او خاطرة ما عن نواقصه,
لو عايز تكون شخص "دافئ" و "محتوى" و "متواجد عاطفيا" و"جدير بالثقة والحب" و"مُشبع" بالنسبة له ,
متعملش الآتى (وحُسن النية ميشفعلكش):

1-ابعد عن النصايح (وده رد الفعل الأشهر فى المواقف دى) , هو مش بيفضفضلك علشان محتاج نصيحة (إلا لو طلب بشكل مباشر)

2-متفترضش ان دى مشكلة لازم تدورلها على حل , يعنى متحاولش تشخص حالته وتسرد اى معلومات من أرشيفك او من اى كتاب قريته , "المعلومات" فى المواقف دى مش بتساعد , انت فى الحالة دى مش مركز مع الشخص , انت بتختبر مدى قدرتك العظيمة على حل مشكلة ما , وهو هيحس بكدة !!

3-متقلبش الموضوع روحيات ,المفاجئة الكبرى ! , هو سمع قبل كدة مليون مرة "صلى" و"صوم" "اقرا الكتاب المقدس" "ارجع لربنا" "ربنا بيحبك", وحافظه اكتر منك,وآخر حاجة عايز يحسها فى الموقف ده مزيد من اللوم او التأنيب الغير مباشر, لإن النصايح الروحية فى المواقف دى بتوصله رسالة انه مقصر فى الروحيات, حتى لو مش ده قصدك, ده غير ان ده يُنصف على انه "سرد معلومات مُؤرشفة " (راجع النقطة السابقة)

4-متستخفش بمشاعره او تقلل من قيمتها على اعتبار انه ده بيخفف عنه !! متقولش "مش مفترض انك تحس كدة"او "انت بتتدلع" او "لا دى حاجة متضايقش" او "انا لو منك ولا هيهمنى" , والمثال الأشهر للأستخفاف بالمشاعر عن غير قصد , لما يكون حزين جدا او غضبان وتقوله "اضحك وفرفش ولا يهمك" وتقلبها تهريج ! ,قمة اللامراعاه ! تأكد انه عمره ما هيشكيلك من حاجة تانى , وهيدور على غيرك يحتويه, لأنك بتحاول تلغى مشاعره من الواقع, يعنى بتلغى كيانه وبتمزق احساسه, ده اكبر عك ممكن تعكه

5-حَدٍث ولا حرج عن الأنتقاد او الإدانة فى المواقف دى "انت ازاى تحس كدة" , "لازم يكون عندك ثقة فى ربنا" "انا لاحظت انك كئيب على طول" !!!

6-متحسسوش ب "الشفقة" , "ياااااه انت صعبان عليا اوى" "انا مشفق عليك" , انت كأنك بتوصله رسالة "انت حجمك صغير اووووووى واتفضحت قدامى " لو حسسته انه فى موقف ضعف او انكسار , سرعان ما هينسحب عاطفيا وهيبتدى يدافع عن كيانه اللى انت هزيته , وطبعا هتكون اخر مرة يفكر يفضفضلك بحاجة

اومال تعمل ايه
هتحاول توصله بإسلوبك, بكلامك , بملامحك , بنبرتك ,بأى وسيلة معبرة , رسالة مفداها "انا مهتم انى اسمعك" "انا حاسس بيك" "انا متفهم مشاعرك" , هو ده الاحتضان والأحتواء اللى هو محتاجه منك , على شرط انك تكون حاسس بيه فعلا مش بتحتال بالإسلوب ده علشان تكسب بيه وده , لو ده مجرد تمثيل سرعان ما هتتكشف !
لو مش عارف تحس بيه , مش حاسس بالموقف , مش لاقى كلام مُعبر ,لقيت نفسك هـ ترص معلومات من ارشيفك :
"اسكت "

منققققققققققققققول