الله اشرق

[walaa farouk]

امبارح في بداية يومي داخل أصلي وأنا مكسوف من ربنا
ومتضايق من نفسي وحاسس بإحباط شديد لأني كتير خذلته😔
وكتير مش بعيش زي ما هو عايز
وكتير بصارع مع حاجات عيب أصارع فيها أصلاً.😞

شوف معايا الجمال اللي صحيت عليه في ترتيب قرايتي العادية للمزامير في مزمور ٥٠ الكلمات دي 'إلهُ الآلِهَةِ الرَّبُّ تكلَّمَ، ودَعا الأرضَ مِنْ مَشرِقِ الشَّمسِ إلَى مَغرِبِها. مِنْ صِهيَوْنَ، كمالِ الجَمالِ
، اللهُ أشرَقَ "الحقيقة أنا كنت أول مرة آخد بالي من الآية دي وحلاوتها!
هقرا معاك تاني الحتة اللي فرقت معايا: "مِنْ صِهيَوْنَ، كمالِ الجَمالِ
، اللهُ أشرَقَ" عشان تشوف أد أيه الآية جميلة ومُشجعة قريتها في أكتر من ترجمة ورا بعض:
"مِنْ صِهْيَوْنَ الْكَامِلَةِ الْجَمَالِ أَشْرَقَ مَجْدُ اللهِ". –
ةمِن صِهْيونَ كامِلَةِ الجَمالِ أَللهُ سَطَع،"
"مِنْ صِهيَونَ المُكلَّلَةِ بالجَمالِ أشرقَ اللهُ علَينا"
"فِي جَمَالٍ سَامٍ يُشرِقُ اللهُ مِنْ صِهْيَوْنَ"
وبالانجليزي اتكتبت كدة: "perfect beauty" كاملة الجمال.

وحسيت ربنا بيقولي الكلمات دي شخصياً. حبيبي أنت كامل الجمال.🥰 ببساطة عشان حاجتين: الأولى: أنت ابني! التانية: عشان أنا هنور فيك وهو ده اللي هيديك أصلا الجمال.😍
الحقيقة دموعي نزلت وقلتله شكرا عشان عينك اللي بتشوفني بيها.
شكراً عشان قلبك اللي دايماً مفتوح ليا.❤️

حسيت الكلمات دي لناس كتير أحب أشاركهم بيها. أنت ابنه،
أنتي بنته. أنت في عينيه كامل الجمال.
عُمرك شفت بنتك أو ابنك ناقص جمال. هو كمان شايفك كامل الجمال. لأنك ببساطة ابنه ولأنه ببساطه هيشرق عليك
وأشراقه ده هيستر على كل ضعف وضلمة فيك.

صديقي أنت كامل الجمال!