بنتك بدأت تكبر ..... استني منها 3 مفاجآت هتصدمك
مشاعر مؤلمه من إحباط وخيبة أمل بتوجعنا كلنا أول ما بناتنا بيدخلوا سن المراهقة ومش بيبقا عندنا كأمهات أى خلفيه عن التغيرات اللى بتحصل في سن المراهقة وبنتصدم أول ما البنات سلوكها يتغير ونبدأ نقول الجمل المشهورة دي
تعبي راح في الأرض
أنا معرفتش أربي
ياخسارة تعبي معاكي السنين اللى فاتت
----------------------------------------
علشان كده محتاجه تعرفي:
📌1_ إن صوتها هيبدأ يعلى عليكي وهتكلمك بإسلوب سيء في بعض الأحيان
متتخضيش😲... دي طبيعة المرحلة بسبب التغيرات الهرمونية اللى بتحصلها وتضارب الافكار والمشاعر عندها اللى بتعملها ضغط دايم وهي متعرفش حاجه عنها ومش عارفه تعبر عن مشاعرها دي صح
اوعى تعلي صوتك قدامها
وخلي عندك حزم كتير وحكمة
ممكن تقوللها أنا عارفه إنك مضغوطة أو فى حاجه مضيقاكى
بس مش معنى كده إني هسمحلك تعلى صوتك قدامي أنا فى أوضتي لما تحسي إنك ممكن تتكلمي بهدوء هتلاقيني مستنياكي علشان أسمعك
وامشي من غير ولا كلمة منك ولا منها ومتسمحيش أن يبقى فيه اي حوار حاليا خالص
متنسيش تختاري وقت مناسب تعلميها إزاي تعبر من مشاعرها صح
إنما بقى لو حضرتك أم عصبية ومش هتستحملي غير إنك تزعقي قدامها فامشي فوراً واعزلي نفسك مع بداية المشكلة وبعد ما تهدي إعملي اللى قولنا عليه فوق ده 👆
----------------------------------------
📌2_هتبدأ تميل بمشاعرها للذكور
اوعي فى بدايات سن المراهقة عند بنتك وأول ظهور لمشاعر الإعجاب بالولاد 😇 تحسسيها إن مشاعرها دي حرام وعيب
لأن ده هيأثر في المستقبل على علاقتها بزوجها
لكن علميها إنها صح بس فى الوقت المناسب زي وقت الزواج لما تكبر .... والمكان الصح وهو بيت زوجها
وشبعيها أنتِ وباباها حب علشان مدورش عليه بره
وعلميها طرق لتفريغ سيل المشاعر الجميلة اللى عندها زي حب العمل الخيري وحب العيلة وحب موهبة عندها....الخ
شجعيها تحكي مشاعرها من غير خوف علشان تعرفي توجهيها بحكمه ايه اللى ينفع وايه اللى مينفعش
ازرعي فيها مباديء وأخلاق تحميها وتوجهها في المواقف المختلفة
------------------------------
📌3-هتتعلق بصحابها تعلق هتحسي أوقات انه مبالغ فيه
اوعي تحطي نفسك في مقارنة مع صحباتها في فترة مراهقتها لأنك هتخسري
لأن فى الفترة دي بيبقوا أهم حاجه عندها في الحياة
ولكن تقدري تكسبيها عن طريقهم وكمان تعرفي هما نفس البيئه بتاعتها ولا لأ لما تعزميهم مثلاً في البيت أو تخرجوا مع بعض
وتتحكمي في ده بنسبه وبطريقة غير مباااااااشرة ..
