عندما عاملناه بأصلنا خان وعندما عاملناه بأصله صان

[بشرى النهيسى]

عندما عاملناه بأصلنا خان ،
... و عندما عاملناه بأصله صان .
أب طلب مهر لابنته عباره عن كيس مليان بصل ..!
واتجوزت بنته فعلا بكيس بصل
وبعد سنه اشتاقت لأهلها ، و طلبت من جوزها يزوروا اهلها ، وبقى عندها طفل رضيع ..
وكان لازم يعدي نهر للوصول لبيت أهلها ،،
هو شال ابنه وعدى وهي بتعدي اتزحلقت ووقعت
.. ولما استنجدت بيه ، رد عليها :
- أنقذي نفسك انتي كل ثمنك كيس بصل .
وربنا بعت لها من أنقذها ، ولما وصلت حكت لأهلها
فوبخ الأب جوز بنته وقاله
خد طفلك وكيس البصل وماترجعش تاخد مراتك إلا وتكون مليت الكيس ذهب ..
مرت الأيام والطفل الرضيع احتاج لأمه ،
.. وكان لازم أنه يجمع كيس من الذهب عشان يرجع مراته ..
و فعلا مرت سنه اشتغل ليل نهار لغاية ما قدر يملى الكيس ذهب ..
وقدم كيس الذهب مهر جديد ..
واخد مراته وفي طريق العوده أول ماحطت رجلها في الميه عشان تعدي النهر جري وشالها على ظهره ،
وقال لها
- حبيبتي انت غاليه ، و مهرك يقطم الظهر ،
ده انا دفعت فيكي دم قلبي ..!
.. لما سمع الأب ضحك و قال :
- عندما عاملناه بأصلنا خان ،
... و عندما عاملناه بأصله صان .
هؤلاء هم بعض أنصاف البشر ٠٠٠....
إن لم تُحسن الإختيار فحاول ان تُحسن التصرف.