ياريت كل الأمهات يعرفو ده

[توتا كمال]

ياريت كل الأمهات يعرفو ده


**أنا بحس دايما بالتقصير والذنب معاها علشان بشتغل

*طيب لما قاعدتي فى البيت 5 سنين من غير شغل كنتي بتحسي بالعكس

**أبداً كان يومي بيروح بين شغل البيت والأكل والنت والتلفزيون

*طيب فين المشكله كده

**مش عارفه

ده حوار دار بيني وبين واحده صاحبتي عن احساسها ناحية بنتها
_____________________________
🌟تعالو نشوف مع بعض مشكلتنا كأمهات ممكن تكون فين

📌المشكله فى ال mindset بتاعتك وانك مش متقبله انك انسانه فيها عيوب ومميزات مش مميزات بس

📌معتقده ان بنتك هتحبك لما تكوني كامله وده مش حقيقى
زي ما هتربي بنتك من الاول على انك بتحبيها بعيوبها ونقاط ضعفها ومن غير شروط هى هتكبر بتحبك بنفس الطريقه "هتحبك زي ما انتِ"

📌"أنتِ كفايه" بنتك مش عاوزه خدمات أكتر ولا ماديات أكتر ولكن انتِ عندها كفايه

📌بدوري على التوازن اللى يخليكي كامله وطول ما بدوري عليه هتفضلي تايهه وحاسه بالذنب
لانه مش موجود

وعلشان ترتاحي دوري على التناغم يعني حسب أولويتك وظرفك يكون اليوم أو الأسبوع
مثلا بنتي عندها امتحان بكره فالاولوية للمذاكره اليوم
عندي شغل مهم لازم يتسلم فالاولويه للشغل اليوم
فى مصيف فالاولويه للاستمتاع مع الاولاد

📌لو بتخرجي لشغل ضروري او شغل البيت بياخدك منها عرفيها هتعملي ايه فى وقت اد ايه وهاترجعلها امتى ولما ترجعي هتعملوا ايه مع بعض وأبدعي فى وقتها الخاص معاكي

📌أدي نفس وقت خاص ولو القليل علشان ترجعيلهم اكتر هدوء ونشاط وعطاء

📌بصي لنفسك بعيون بنتك

📌واعرفي أنك أكتر أم مناسبه لها فى العالم لأنك اختيار ربنا لها ...انتِ الام اللى بنتك محتاجاها......