مكالمة من السما حدث معي :

[souad jaalouk]

مكالمة من السما
حدث معي :

آلو ستي!!! عم تسمعيني!!! كيفك شو اخبارك زمان زمان ما حكينا، انتي بتعرفيني بهالفترة بنعجق بمغاير الميلاد، إيه إيه بعدني يا ستي بعدني!! هلق صحيح عم اكبر وهمتي عم تتقل بس انّه.... بتبقى الناس ناطرتني ومحضرين غراض المغارة وراقا وكراتينا متل ما بكون قايلّن ومجمّعين بعضن هني وولادن وختياريتن... يشوفوا بهالساعتين كيف بدا تصير مغارة تليق بهالطفل الجايي وتليق بصلوات العيد وريحة البخور وكاسات القمح المزروعة بعيد البربارة...
صحيح ما حدا حاسس بالعيد بس معك حق العيد حاسس بالناس، أيا مشاريع؟ لا لا يا ستي السنة مش قادر اعمل شي رزقالله على مشاريع ( جينا نعيدكن ) يلا بسيطة، بس بتعرفي شغلة كنت لما يسألوني بوقتا هالبيوت السنة الجايي رح تزورونا كمان؟ اضحك وقلّن اذا نحنا ما زرناكن في صاحب العيد اكيد رح يزوركن... ستي غلا وكوا بس مش مشكلة منضل قادرين نزين بيوتنا ووبيوتن بركي هالحزن بضبضب غراضه وبفلّ، لازم لازم البيوت البلاكين الطرقات كلها تتزين وتتحضر للعيد... لك ايه ايه شو بدنا نضل عم نخبط راسنا ونسمع نق بنق...ولك كستي نحنا اذا مَتلنا حدا منجبلو زفّة ورقص وزمر...أقل شي نزيّن عالميلاد!!! عم تقوليلي...
ما سمعت شو قلتيلي؟! هاهاهاها لك ايه ايه بعدني بحط تبن بالمغارة بس مش من مزرعة حبّوق... الله يرحمه،.. بتتذكري لما عملتلك مغارة قدّ القوضة كانت كاملة من كل شي طواحين وشلالات وموقدة وخواريف وغيرن وكان بعد بدي تبن وشعير... ولما حضرة جناب قرابتك جبلي ياهن من مزرعته ريحتن بقر بتموّت بتتذكري شو صار فيكي؟!؟! قلتيلي دخلك يا ستي ريحة البيت صارت بقر ودواب وقلك انا معليش هيك بتحسّي حالك بالزريبة وكأنك معهن بالمغارة، بس ما كنت عارف رح تورّمي وتحسسي وتفوتي مستشفى... بس يلا أصل النية.. ستّي انا عارف انه هالوقت الصعب رح يمرق، والغيمة رح تزيح لهيك ما بدي مرّق هالايام بالحزن وبعدني مكمّل مغارة ورا مغارة بتتلوّن البيوت وتتزيّن ايامن حتى نتغلّب على احزانا ونضلّ واقفين على اجرينا... وانتي من عندك قوليلو يحطّ ايدو معنا مش تنغيرّ المسار بس حتى نعرف نواجهو... ما توصّيني يا ستّي عم جرّب قد ما بقدر... بعرف انه مش وحدي ولا لحالي... شو نسيتي صديقتي الام تريزا شو بتقول؟! رسالة الميلاد هيي انك ما عدت وحيد وانه يسوع إجا كرمالك حتى يكون معك وحدّك.
فتحوا شبابيك بيوتكن حتى الحزن يهجرها وزينوا بيوتكن خلّي العيد والفرح يفوت من بوابها ويملّيها حب وفرح وسلام وصحة وعافية ونصلّي كلنا سوى وّلد المسيح هللويا