تعالي في حضني

[walaa farouk]

=فاضي؟
-ومستنيكي
=محتاجالك
-انا جنبك اهو
=...

-انا سامعك سرحانة في ايه!
=مش عارفة ابدأ منين...الكلام متلخبط
-اتكلمي وانا هرتبه
=انا اسفة ، انت استحملت مني أخطاء كتير يارب..
مش زعلان مني!؟
-انا مبزعلش منك، انا بزعل عليكي..
. بزعل عليكي لما بتسيبيني و تسيبي حضني و تجري لحضن الدنيا..
=ازاي بتقدر تقبلني تاني!
-لأنك بنتي وحبيبتي، مهما بعدتي مش هتلقي
مطرح ليكي غير عندي...غير في حضن ابوكي
=هتُسكن قلبي اللي مليان ندوب و جروح و مفيهوش مكان سليم يليق بيك!؟
-هو دة مكاني الصح.. وهي دي مُهمتي، اني اعالج جروحك و امحيلك ندوبك و ارجع الضحكة من تاني في روحك
=بس دة مكركب على الاخر
" ابتسَم"
-هرتبه
=غريبة..
-ايه الغريب
=قادر تحبني بكل عيوبي دي!
-عيوبك اللي انتي كرهاها هي السبب في تمسُكك بيا دلوقتي
، هي السبب اللي بيخليكي تيجيلي جري وتستخبي فيا من الناس، دي مُميزات
=بس الناس مبتشوفش كدة! هفهمك..
-فهميني
= في ناس بتقتل كل الحلو اللي جوانا، بتقتل كمان فرحتنا بنجاحنا او حتى بأنجاز صغير عملناه، بتستني تصطاد الأخطاء و تنشرها
.. بيدوسوا على الوجع و بيزودوه، بيغرسوا فيا سكاكين بكلامهم و أفعالهم.. شوهوا صورتي في عيني و هزوا ثقتي في كل الي حواليا.. وجايز في نفسي كمان!
=الناس مؤذية..
-انا طبيبك، مهما اذوكي ومهما عملوا هتلاقيني في ضهرك،
بدافع عنك و بصلح كل اللي بيبوظوه جواكي وبجدد طاقتك من تاني، قُدرتك ليها حد وانا مش ممكن اسمح بحاجة تفوق تحمُلك، وقت ما تتخنقي ماتروحيش للناس، كلام الناس مش هيداوي، اجري عليا انا و قوليلي كل اللي ف قلبك.. واوعدك... اني هاجبر بخاطرك

" مَد ايديه مسح دموعي و هو بيقول :
-تعرفي ان انتى جميله اوي
' ضحكت ضحكة استعجاب '
=انا جميلة!!
-اثبتلك!؟
=اثبتلي..

" اخدني قدام مرايا كبيرة "
-بصي لنفسك كويس، شايفة ايه؟
"فضلت واقفة ساكتة باصة لنفسي لمدة دقيقتين بعدين اتكلمت"
=غريبة!
-شوفتي ايه!
=انا شوفتني بصورة غريبة!! صورة اديلي كتير مشوفتش نفسي بيها
، انا شوفتني جميلة! ملامحي تشبهك اوي.. لكن مش بس في الشكل، انا شايفاني من غير جروح ومن غير ضلمة في قلبي... شايفاني ع صورتك..
=لكن..
-ايه!
=دة عشان انت جنبي.. بمجرد ما هتمشي المرايا دي هتتقلب،
هرجع اشوف نفسي مليانة كسور و عيوب ، هترجع روحي تضلم تاني
"نزل لمستوى طولي وقال
-بس انا على طول جنبك! مش انا اللي همشي يا حبيبتي
، انتي بتبعدي و بتسيبي ايدي ف بترجعي تشوفي صورتك القديمة
، لكن انا جنبك.. وهفضل جنبك ،
ثقتك المهزوزة انا هظبطها و جروحك هداويها و ألمك همحيه و حياتك الجاية هتبقى تعويض.. تعويض وبس
=انا بحبك
-تعالي في حضني ❤️