العسل المر

[walaa farouk]

فيه كلام بنقوله لبعض ، شكله دعا و حب و اطمئنان، بس كله جرح و مرار ..

لما تلاقي واحد انت عارف نتيجته طلعت اوعي تسأله عن مجموعه أو تقديره
، و تقوله "مش ان شاالله خير ؟؟" .. انت كده بتحرجه ..
سيبه هو اللي يقولك لو حب و من غير ما تسأله..
قوله "ربنا يطمنا عليك دايما و يوفقك " ..

لما تلاقي واحد في ثانوية عامة اوعي تقوله "ان شاء الله طب " أو أن شاء الله هندسة "
.. انت كده ممكن تعجزه.. قوله "ربنا يفرح قلبك و يوفقك و يباركلك في دراستك" ..

لما تشوف بنت عدي عليها سن الزواج ، اوعي تقولها "ربنا يوفقك في عريس" ..
انت كده بتجرحها من غير ما تقصد .. قولها بس "ربنا يديم عليكي فرحتك" ،
"ربنا يبارك حياتك" ، "ربنا يكتر من امثالك و يعلمنا من اخلاقك" ..

لما تلاقي عيلة خلفتها بنات اوعي تدعي لهم "المرة الجاية ولد لن شاء الله"
.. انت كده كسرت قلبهم .. قولهم "ربنا يفرحكم بيهم .. البنات عز و فرح و نور البيت " ..

لما تلاقي أسرة لسه ما خلفتش اوعي تقول لهم "اتاخرتم ليه"
، أو "ح تفرحونا قريب امتي" أو "ربنا يطعمكم" ..
انت كده كأنك بتقولهم انتم معيوبين و بتدخل في شئونهم.. قولهم بس "ربنا يديم عليكم الهنا و العز
و يسعدكم و يسعد ايامكم " ..

احيانا و احنا بنطمن علي الناس نبقي بنجرحهم و ننط جوه خصوصياتهم ..
و أحيانا و احنا بتدعي لهم نبقي بنشاورلهم علي نقطة ضعف هما ما لهمش ذنب فيها ..

الكلام الحسن شهد عسل، حلو للنفس وشفاء للعظام.. (الأمثال ١٦: ٢٤)