|
 |
 |
 |
|
رقم المشاركة : ( 1 )
21 - 02 - 2020, 11:05 PM
|
|||||||||||
|
|||||||||||
 الشهر اللى فات سكن واحد فى الشقه اللى قصادى ، اول يوم وانا رايح الشغل شوفته ابتسمتله وقولتله اهلاً بيك نورت العماره ، لاقيته مكشر جامد فى وشى وقالى شكراً ومشى .. انا اضايقت طبعا موقف محرج جداً ، واحد برحب به بإبتسامه وفى الاخر هو يقولى شكراً وعلى وشه غضب ربنا .... من ساعتها حلفت انى ماسلمش عليه ابداً ولا حتى اعبره .. من اسبوع خبط عليا الساعه ٥ الفجر ، طلعتله لاقيته بنفس التكشيرن بتعته وكأنه قرفان منى ، قولتله نعم فى حاجه ؟ وانا اصلا مش طايقه ، قالى ماعندكش حتة كارتونه أسد بيها الشباك عشان الزجاج بتاعه مكسور .. بصراحه انا ماكنش عندى بس كان ممكن اطلع اجيببه من البقال اللى فى الشارع اللى جنبنا لانه يعرفنى ، لكن قولت فى بالى ده قليل الذوق مايستهلش أصلاً.. قولتله لا ماعنديش شكرنى ومشى قومت انا رازع الباب ودخلت ، من مخنوق منه على الموقف المحرج بتاع اول مره وحقى بصراحه ، واحد اضحك فى وشه وهو يقابلنى بكل قرف ليه !!!! المهم امبارح الفجر كنت راجع من الشغل جعان موت ، قولت اقلى شوية بطاطس واتعشى بيهم .. واثناء وانا بحط البطاطس فى الزيت ، كنت بحطهم من بعيد عشان الزيت المغلى ما يطرطشى عليا .. قامت الطاسه مقلوبه على النار لهبت جامد ووقعت على السجاده قامت ماسكه النار فيها وقامت حريقه جامده فى الشقه ... وانا واقف وسط النار مش عارف اعمل اتحرك يمين ولا شمال النار حوليا من كل حته .. وقفت لمدة ثوانى بشوف نهايتى قدام عنيا ، موقف اول مره فى حياتى أتحط فيه وماعنديش اى خبره اتصرف ازاى ، منظر النار لوحده شل تفكيرى .. من شدة النار والدخان وقعت أغمى عليا .. فوقت على جردل ميه ساقع تلج اتدلق عليا .. قومت بشهق كأنى بغرق ، بعد محاولات من الإستيعاب ، بصيت لاقيت جارى الجديد بنفس تعبيرات وشه المكشره .. قولتله فى ايه ...؟ قالى كنت راجع من عندك شوفت دخان كتير طالع من شقتك ، خبطت كتير ماسمعتنيش ، قومت جريت على عربيتى جبت طفاية الحريق وكسرت باب شقتك لاقيتك مغمى عليك .. بصراحه انا اتكسفت قوى من نفسى على كل ظن سىء ظنيته فيه .. شكرته جدا وقولتله.. - انا أسف ماتزعلش منى ، بس انت ليه على طول مضايق وقرفان من نفسك وعمرك ماضحكت فى وشى هو انا زعلتك فى حاجه؟؟ قالى من سنتين نزلت عليا جلطه ، شلت اجزاء من وشى وهى دى سبب التكشيره الدايمه ، ارجوك ماتزعلش .. قولتله ارجوك انت ماتزعلش ، دا لولاك كان زمانى ميت دلوقتى .. عزيزى القارىء بلاش تترجم كل افعال الناس من وجهة نظرك ، ألتمس العذر للناس ، جايز اللى اتعصب عليك يكون تعبان فى بيته او شغله ، جايز اللى ماردش عليك وانت بتكلمه مشغول فى موضوع معاه مش بيطنشك زى مانت فاكر ، جايز اللى مضحكش فى وشك حزين على حاجه وجعاه وماسك دمعته بالعافيه .. أرجوكم أحسنوا الظن بالناس .. 
|
| أدوات الموضوع | |
| انواع عرض الموضوع | |
|
العرض الشجري