اعكسها و تعقل

[walaa farouk]

قوانين الدنيا عاوزة اللي يفهمها ..

تجري وراها و تتحايل عليها تجري منك
، و تتشعلق فيها تخلي بيك ،
لكن ترميها ورا ضهرك تيجي تحت رجليك..

تطلب منها كرامة تذلك، تهرب من المجد تجيبهولك لغاية عندك..

تحوش لنفسك، غيرك يصرف اللي حوشته،
تصرف و تدي و تسعد اللي عندك يكتر و الفرح يكبر ..

تملك كتير و تكبر رصيدك همك يكبر أكتر،
توزع و تفرح اللي حواليك، فرحتك تعلي و تعلي ..

تجري علي الكراسي و المناصب تديك و تحنيك و تبكيك،
ما تطلبش منها حاجة تعليك و تهنيك و تحبب الخلق فيك..

تقلق علي اللي فيها ، القلق يزيد و يفيض، ترمي طوبتها
، اللي عندك يزيد ..

تضحك لها تبكيك ، تضحك عليها تتحايل عليك و تهنيك ..

تخاف منها تضنيك، ترمي الخوف ورا ضهرك يهرب من تحت رجليك ..

تبقي عليها تعييك، و لو ما طلبتش منها تتحايل عليك ..

يبقي تعمل ايه؟؟

اعكسها و تعقل!!