صلي تا تصغي ، صلي تا تفهم ، وصلي تا تعيش إيمانك وتطبق وتشهد ، صلي تا تتحول لنور ، إصغ بصلا وافهم الحقيقة بصلا وعيش واشهد بصلا خلي حياتك تكون كلها صلا وخدمة ، صلي بمخدعك بحرارة مع الرب بتحفظ روحك وبتفتح عقلك على سر الله ، صلاتك الشخصية بإنفراد مع الرب بتحطك بقلب الله ، صلاتك العائلية بحضن العيلة بتوضعك بحضن الثالوث ، صلاتك الجماعية بقلب الكنيسة بتثبتك بجسد المسيح + صلي + الانسان اللي بيصلي بيعيش سر الوجود ، والانسان اللي ما بصلي بالكاد موجود .
وقاف مع كل أخ ألك شربة ميّ ، دلّو عا الطريق ، دلّو عا النور : اذا راد يمشي حدك مشيه قدامك ، واذا طلب تمسكو بإيدو امسكو بالتنتين ، اذا حاول يزيحك عن الطريق أو يردك للخلف افلتو لأنو الطريق طويل والشغل كتير بدكن تزرعوا الارض صلا وبخور ، ازرعوا الارض محبة .الرب بيتألم لرؤية الناس يلي تجسد من أجلهم حتى يحررهم ومات وقام حتى يعطيهم الحياة والسعادة الابدية، عبيد مكبلين وعم يفتشوا على سعادتهم بمطارح ما رح يلاقوها بهالعالم الفاني + + + ليش الانسان بيسعى ورا الذهب ؟ تا يعطي قيمة لحالو ؟ الانسان أغلى بكتير من الذهب ، الانسان ابن الله وقيمتو منو فيه ، الذهب ما بيحرر الانسان من قيودو ، بس بيخليها تلمع اكتر .عم تركضوا تا تأمنوا مستقبلكم ومستقبل اولادكم ، تذكروا دايما” إنو مستقبلكم مش هو آخر ايامكم بهالعالم ، لكن هو أول يوم بالعالم الآخر .
التزموا بالكنيسة وبكل تعاليمها، و ثابروا على الصلا بدون ملل. كرّموا أمنا العدرا، و تسلّحوا بالمسبحة، لأنّو إسم مريم بيبدّد الظلمة و بيسحق الشرّ. كونوا رهبان بقلب هالعالم، ولو بدون ثوب.
إزرعوا ألارض صلا و بخور. كونوا قديّسين و قدّسوا الأرض.
و تأكدوا إنّو كلّ ما تكونوا عم تصلوا، بكون عم بصلّي معكن، تا تتقدّسوا ويتمجد إسم الربّ .
11 - 08 - 2019, 05:41 AM
العرض الشجري