راسي بيك مرفوعة

[walaa farouk]

متواضع بكل تأكيد ، لكن عزيز النفس راسي مرفوعة..

عزة نفسي في السما مش لاني كبير في نفسي ، لأني كبير بربي ..
صورته و مثاله، ابنه ، سفير شايل اسمه ، روحه ساكنة في ، اسمي علي اسمه.
. القديسين أهلي ، الشهدا أجدادي و الملايكة عيلتي و السما بيتي
، يبقي ازاي ابص لنفسي اني قليل ؟؟

ايوه كلي ضعف ، و عارف اصلي ، لكن عارف كمان اني قوي لاني من صنعة سماوية ..

نقطة توازن سانداني، لو عليت في نظر نفسي افتكر ان كل كرامتي من عنده
و لو ضعفت لاني من شوية تراب ، افتكر انه مسامحني و قابلني زي ما انا..

تواضع القلب يسندني لو اتحاربت بالكبر ، و عزة نفسي تسعدني و تسندني،
فعمري ما ح اقل في نظر نفسي و لا ح اسمح لحد يشوفني قليل و لا يسترخصني..

و انا زي سيدي و تاج راسي اللي اتواضع و خد صورة عبد علشانى،
لكن عزيز النفس إله القوة ما يخافش من حد ..

شوفه وقت الالم قدام الجنود اللي قبضوا عليه ملك متوج ،
وقعوا عند رجليه من الخوف (يوحنا ١٨) ، قدام بيلاطس و هيرودس،
ملك ملوك بيعلمهم و يفهمهم .. قدام الجنود وسط الالم عمره ما اشتكي و لا اتوجع
شال صليبه و شرب كاسه بالكامل و هو رافع راسه فوق الهم و الدم ..

عمره ما وطي راسه لحد ، و المرة الوحيدة اللي نكسها (يوحنا ١٩)
، بس يوم ما خد القرار بنفسه (و هو بس اللي قدر يعطي أمر تسليم روحه بنفسه) انه يسلم روحه
، اصله خالق الكل..

عزة نفسي من عزة الهي .