حاجات بسيطة بس بتفرق

[مورا مرمر]

.. قبل الفرح، خطيبتي صممت تلبس عدسات في عينيها، وانا كنت رافض الموضوع، بس هى كان نفسها تلبسها..

نزلنا واشترينا النوع اللي هى حباه عادي وكانت مبسوطة بيه جدًا.. ولما سألتني ليه كنت رافض إني البسها، قولتلها عشان عينيكي أجمل من العدسات بكتير..
يوم الفرح ماكنتش لبساها ❤

.. أختي في مرة طلبت منها تعملي فشار وكانت مشغولة، قالتلي لا مش فاضية اعمل انت..
قولتلها انتي بتعمليه أحلى مني " رغم انها بتحرقه 😂 "
قامت عملتلي حلة كبيرة ماكنش فيها فشارة واحدة وحشة ❤

..واحدة كانت بتحط مكياچ كتير، في مرة بتقول لخطيبها انا وشي باظ من البودرة بس مش هعرف انزل من غير ما احط على وشي عشان بيبقى شكلي وحش..
قالها شوفتك مرة من غير مكياچ وكانت أجمل بكتير جدًا وجمالها كان طبيعي جدًا.. من ساعتها لحد دلوقتي ماشوفتش نقطة بودرة على وشها تاني ❤

.. اختي، في مرة كلمتني زعقت معايا وقالتلي انها متضايقة مني من مواقف كتير وفضلت تزعق وكانت متعصبة جدًا من المواقف اللي حصلت، سبتها تكمل لحد الآخر وقولتلها إني عندي مشاكل تعباني الفترة دي.. ، فجأة اتحولت المكالمة من واحدة بتزعق ومتعصبة لواحدة كل همها تحل معايا مشاكلي وتخرجني من الزعل اللي كنت فيه، وفعلًا ما سابتنيش غير وانا كويس ❤

حاجات بسيطة جدًا جدًا بتفرق معاهم، بس للأسف ناس كتير لسة مش فاهمين ....
منقول...
‏