كلمات شافية وقت الزعل

[walaa farouk]

وقت الزعل فيه كلام يزود الجرح جرح :
زعلان ليه او ما لوش فايدة (و كأن زعله من غير لزمة )
، انا ما غلطش(يعني هو اللي غلطان)
، انت اللي ابتديت و ما لكش حق ،
انا عملت بأصلي و حيت (يعني هو ما بيفهمش في الأصول )
، ح تفضل زعلان كتير (يعني اخلص و ما تطولش في كلام تافه) ..
و بعد كده نقول الناس ما بتصفاش و العتاب غير مفيد..

و فيه كلام يرطب و يداوي و يفرح :
ما يهونش علي زعلك، زعلك غالي قوي(بتشتري خاطره) ،
لو زعلتك حقك علي (تواضع يكسر نار الزعل )
، انا عارف ان اللي بينا اكبر من اي حاجة (هو غالي عندك)
، عمري ما اقصد اي حاجة من اللي انت فهمتها(بنفتح باب للتصافي)

طبعا عارف ان الموضوع مش بالبساطة دي و أن فيه ناس مهما حاولت ما بتصفاش..
علي الاقل تبقي حاولت و قدمت الحب و كسبت نفسك و الناس ..
كتير قوي ح يفرق معاهم كلامك الحلو ، و اللي مش ح يستجيب
، خد منه مسافة لغاية ما يهدي ، و حتي لو رفض حبك
، ما تلومش نفسك ، هو بتحمل عمله
، و اسمك رميتله بذرة الحب و ح تطرح علي مهلها ..
صح ؟؟