سيبه يكمل شغل فيك

[walaa farouk]

توجهت مع أحد اعز اصدقائي لاحد مراكز تجميل وMake up علشان نستقبل عروسته ..

لكن إستنينا وقت علي ما العروسة تكون جاهزة وينتهي تجهيز مكياجها ..

وخلال الوقت ده كان بيدور في تفكيري ..
طب لو العروسة طلعت قبل دقايق من استكمال المكياج .. ايه اللي هايحصل ؟
لقيت اننا نتأخر شوية عادي ولا ان العروسة تطلع قبل ما تكون استكمل الماكيير شغله بنسبة 100%

لان في اليوم ده .. بتكون العروسة محط انظار الجميع ،
والنور بيكون متسلط عليها بشدة وكل الانظار عليها سواء عدسات الكاميرات او عيون الناس
.. ولشدة الاضاءة وجودة الكاميرات أقل عيب بيكون واضح جدا والنور القوي بيفضح العيوب
غير انها بتكون علي استيدج اعلي .

ولقيت بنفس الفكر
الله بيقول لي .. ماتطلعش من تحت ايدي قبل ما اخلص شغل فيك ! ..
ماتخرجش من النور البسيط لنور اكبر قبل ما تكون في احسن صورة .
. أنا مش بأخرك علشان برخم عليك وارازيك لكن انا بحبك وعايز لما اطلعك تكون في ابهي
واجمل صورة وافتخر بيك واقول اللي شايفينه ده ابني .
. ده شغلي ده حلمي وده تصميمي ودي عمايل ايديا ،
اشتغلت عليه وفيه بدقة وفن لحد ما بقي الصورة اللي انتوا شايفينها دي .

لكن لو خرجت للنور قبل وقتك .. الناس هتلاحظ كل عيبة
وكل تفصيلة وكل ثغرة وهاتبقي ضيعت عليك فرصة ذهبية .. هاتبقي اتحرقت ، وحرقت الفرصة !
ده غير ان النير هايكون تقيل علي وزنك الحقيقي !

انا عايزك تخرج تخرج وانت في كامل قوتك .. لان الانطباع الاول اللي هيتاخد عنك
وانت محط انظار والضوء متسلط عليك هايدوم ..
وانا مش عايز الانطباع ده يكون مش قد المقام ولا نص نص .

سيبني أكمل شغلي فيك وفي كل خاصتي ..
لحد ما اعمل عروسة بلا عيب وبلا غضن تكون جاهزة انها تعكس جمالي وروعة تصميمي لكل الناس .

بشكر الله .. انه كتير كان بيأخر خطوات كتير قبل الخروج للنور ،
لحد ما يجهزني كويس اوي علشان فعلا النور القوي
علي قد ما هو بيلمع الوجه علي قد ما بيفضح الانسان لو لسه مش جاهز وكامل ومكتمل .

وانت كمان
سيبه يكمل شغله فيك ويجهزك كويس
ماتخرجش من تحت ايده وتطلع للنور
قبل ما هو يخلص شغله وهو اللي يطلعك بنفسه

وماتخرجش من تحت ايده وتفضل تشتكي التأخير
انت كدة بتتأخر وتأخر نفسك أكتر
لكن قوله انا تحت ايدك جهزني وجملني للاخر
وانا واثق ان مواعيدك مظبوطة

وصلي :
" قبل كل عمل جمل وجهز العروس ، لحد ما تكون جاهزة لمقابلة القدوس " .