اكس لارج

[walaa farouk]

نادرا لما بشوف فيلم مصري حديث .. لكن خليني اعترف ان فيلم إكس لارج من أنضف الافلام اللي شوفتها في السينما المصرية في القرن الحالي .

للفيلم عدة حقايق لو عرفتها واهتميت بيها حياتك هاتتغير للافضل :

١) (يا تخيين)
انت بطل الفيلم ، حتي لو انت مش تخين بس الفيلم موجه ليك انت .. مش المقصود السمنة تحديدا .. المقصود ان فيه نقطة ضعف عندك هي اللي معطلاك (خطية ، ادمان معين ، عيب قاتل في شخصيتك ، سلوك خاطئ ، خوف من الفشل ، ..الخ)وهي اللي لو انتصرت عليها حياتك هاتبتدي تتغير تغير جذري .. وهو رامز ليها في الفيلم بالسمنة .

٢)(اوف بقي ياخالي)
كلنا محتاجين في حياتنا حد زي خال أحمد حلمي اللي هو ابراهيم نصر .. يعكنن عليك عيشتك لما تكون ماشي غلط بدافع الحب ويفضل يوجهك أو بمعني أصح يكون مرايتك .. لما تكون دوافعك مش مظبوطة يواجهك ويقولك ماتضحكش علي نفسك انت قصدك كذا .. لما تكون مدمن لشئ حتي ولو كان فيس بوك مثلا اوالموبايل يفضل يلفت نظرك لحد ماتقتنع جدا ان عندك مشكلة وتبدأ تاخد خطوات فعلية للتغيير .. للأسف فيه كتير مننا لما ربنا يبعتلهم اشخاص كدة تواجههم بيهربوا منهم .. مع ان وجود شخص حاسم معانا اهم من وجود شخص مشجع رغم ان الاتنين مهمين لبقائنا .. الا ان لما يكون حد فوق راسك بيوجهك بمحبة وينتقدك ده هايفرق معاك جدا في حياتك وهاتحس بالفرق في المستقبل .

٣) (بتنهج وانت بتلبس الشراب)
فيه حاجة متقلاك جدا ومخلياك تخين جدا ومش قادر تتحرك ومعطلاك ومخلية امور كتير متعطلة في حياتك .. الحاجة دي هي روتين الذات و عدم الارادة او بمعني ادق السلوك بالمزاج و عدم الانتصار علي النفس .. انت ماشي حسب مزاجك مش قادر تكسر الروتين مش قادر تكسر مزاجك مش قادر تنتصر علي نفسك وعلي انانيتك وعلي رغباتك واتجاهاتك وميولك اللي تقدر تستغني عنها واستغنائك عنها هايخليك خفيف وهايدفعك للامام .

٤)(انت كنت بالنسبالي حالة ! )
كل فترة صعبة بتمر بيها .. هي فرصة من ذهب للمجد وفرصة
ربنا سمح بيها لاجل نقلة غير طبيعية ان حياتك تتغير للتميز
عايز تصدق ده وتتضع وتعترف بأخطائك وتنطلق في الاتجاه ده يبقي رائع
عايز تنطلق في اتجاه اللوم علي الاخرين وانك مظلوم في الحياة يبقي براحتك .

٥)(انا مش جعان)
فيه خطوة مهمة جدا في رحلة التغيير .. عدي بيها بطل الفيلم ودي من اصول الحياة الروحية .. ان مهم الانسان ياخد فترة يختلي بيها بنفسه يفصل عن كل العلاقات والاعمال وحتي المستلزمات الشخصية .. والهدف ان الانسان يركز مع نفسه ومع ربه ويراجع حساباته ويكتشف نفسه .. هو مين ؟ ويكتشف قوته .. قد ايه جواه طاقة جبارة مستخبية ! .. يعالج عيوبه ويشوف مميزاته بوضوح .. للاسف فيه اشخاص بيهربوا من اللحظة دي وبيخافوا من مواجهة نفسهم فبيلجأوا لدخول في علاقات متعددة او قصص حب او شغل مكثف .. وفي الحقيقة ان ده بيكون زي المخدر بينسي الانسان للحظات لكن نتايجه خراب لحياته .. لكن المرحلة دب كانت نقطة تحول وتغيير حياة بطل الفيلم .

٦) (مجلة ميجو )
انت جواك كنز .. صدقني جواك كنز
معرفش هو موهبة ولا مهارة ولا فكرة .. لانها بتختلف من شخص لاخر .. لكن في الاول والاخر انت جواك كنز
فيه ناس غامروا زي مجدي واختلوا وصارعوا فترة مش قليلة ومش سهلة و اكتشفوه وعاشوا اغنيا واغنوا اللي حواليهم وناس عاشت حياتها طبيعي زي ما الناس ما هي عايشة ورضيوا للامر الواقع .

٧) (ايه ده مجدي
حقيقة لازم نعترف بيها .. ان مهما الناس اتكلموا عن الحب غير المشروط فده مجرد كلام .. الناس تحب تشوفك ناجح ومؤثر وبتتحدي نفسك وبتنتصر مهما اظهروا انهم بيحبوك لشخصك .. هما مش هايلتفتوا ليك او يفتخروا بيك الا لما تكون ناجح ومؤثر وشايفين فيك انك بتنتصر .. كل اللي حوالين مجدي بطل الفيلم ما اتجمعوش حواليه وعينيهم مليانة لهفة وحب الا لما انتصر علي نفسه ونجح وشافوه بيعمل شئ جديد في الحياة .. وهنا نستنتج ان " ربنا بس اللي هايحبك حب غير مشروط .. لكن الناس هاتحبك اكتر حسب مدي تأثيرك " .. علشان كدة مهم تتغير وتتطور من نفسك باستمرار

ماركو جرجس