شريط الألم

[walaa farouk]

مفيش ولا حد فينا معداش بفترات ألم و وجع... لكن ثواني بس!!
انهى ألم و انهي وجع؟؟
من اكتر الامور دموية و قهرا فى حياة كل الانسان ان يفضل جواه شريط من الذكريات المؤلمة الى انا هسميها ( بفعل فاعل) يعنى انى اكون متربى فى بيت و اسرة سوية و بابا و ماما بيربونى صح بدون ظلم و قهر و ضرب و ايذاء نفسى و بدني . فا زكرياتى هنا هى زكريات قهرية قاتلة و من المحتمل انها تفضل جوايا طول عمري فا دى الزكريات الى بتحصل بفعل فاعل
اما الزكريات الى بتحصل بسبب الظروف و الحياة زى ( وفاة احد افراد الاسرة - رسوب فى الامتحانات - الانتقال من دولة الى دولة - الخ ) الظروف دى هى خارجة عن ارادة الانسان فا بالتالى وجودها فى حياتنا مش مرتبط بشخص معين تسبب فيها لكنها دى الحياة ومفيش حد معين بعينة هو المتسبب فيها
لما بنبدء نواجه مشكلة فى الحياة ونوصل لمرحلة الاكتئاب منها فا بيبدء الهارد ديسك الى جواك يفتح الملف الحزين و يبدء يحط المشكلة او الالم الحالى ضمن ارشيف الالم السابق و يبدء يربط الامور ببعض ويحسسك بالخزي و القهر و الانهزام خصوصا لو كان الموقف المؤلم الحالى هو مترتب عن احداث سابقة بسبب اشخاص او بسبب اخطاء الاسرة او ظلمها ليك او ما شابه
الارشيف الحزين موجود جوه كل واحد فينا لكن المهم انه ميكونش ارشيف بفعل فاعل
الحياة صعبة و فيها ناس خطاه و اشرار كتير و ناس مؤذية اوى و ده كله بيدخل و يستجل فى الارشيف لكن لارشيف الاصعب و الاكثر ألما فيهم هو التربية
علشان كدة بقول لكل الناس المتجوزة وعندها اطفال : خدو بالكم علشان كل لحظة فيها انت قهرت ابنك او بنتك فا كل ده بيتسجل جواه و بيتحط جمب كل وجع عدى فيع طفلك . اسم الفاعال . مع كل مرة فيها بتظلم او بتضرب او بتقهر او بتهين ابنك او بنتك فا ده هيتسجل جواه و عليه اسمك
و على العكس كمان . فى كل مره هتعمل فيها حاجات حلوه ليهم فا ده كمان هيتسجل جواهم و عليه اسمك
و ما بين الذاكرتين الوحشة و الحلوة لازم هيتحط اسم شخص ما
عندك قرار دلوقتى انك تعمل حاجتين: اولا : انك تحاول على قد ما تقدر انك تقلل من مساحة تخزين الزكريات المؤلمة فى حياة طفلك و ثانيا انك تكبر مساحة الزكريات الحلوة فى حياته و اسمك كدة كدة هيتحط جمبها
افتكر دايما حاجة مهمة و هى : انك فى كل مرة بتوسع زاكرة الالم جوه طفلك بسبب تربيتك الوحشة و اسلوبك القاسي فا متتوقعش منهم انهم لما يكبروا هيكونو زيهم زى الاطفال التانين الى اتربوا افضل لان التخزين المؤلم الى جواهم مش سهل يتمحي.
شريط الالم الى بيحصل عليه الطفل فى التربية مش بيختفى لما بيكبر و لكنه بيتسع اكتر ليشمل وجع و ألم الكبر فا الرصيد بتاعه بيكون مؤلم جداااا

لو مش هتربى ولادك كويس فى مخافة ربنا و بالاحترام و التقدير و الحنية فا انصحك كأخ انك متتجوزش خاااالص بجد لانك لو ربيتهم كدة فا انت بتقدم للمجتمع مرضي . و مجتمعنا اصلا مريض هو كمان مش مستشفى للعلاج . فا مريض موجود فى مكان مريض هو كمان فا اعتقد ان فرصته فى الشفاء صعبة جداا