ترويض الوحوش

[Rena Jesus]

ترويض الوحوش
بص يابرنس لما تلاقيها متضايقه متحاولش تقولها مالك لان الاجابة بإختصار هتبقى مفيش
وهتدخل ف دوامة انت لو مهتم كنت عرفت لوحدك وهتلاقى حاجات حصلت من عشرين سنه بتتعاد فإياك تسألها مالك
سامعك ياللى بتقول ايوة كدة هروح استكنيص لحد ما تهدى وتروق
هتيجي تولع فيك انت صدقنى

نصيحة لما تقفش قوي وانت عارف وبتستهبل متفتحش الموضوع
افتكر حاجه حلوة بينكم حاجه بتضحكها ياعم قوم ضحكها غصب عن عين امها
هتنسى وهتروق والمشكلة بدل ما كانت هتكبر هتلاقيها بتحكيهالك بعتاب
متبقاش قفل وعديها
واياك ثم اياك يابن ادم من تصدير الطارشة
هتلاقي انبوبة البوتوجاز فضيت وانزل املاها علشان تعمل اكل تطفحه ( هتتقالك كدة )
وهتلاقى اللمبة اللى شغاله من اول ما اتجوزت اتحرقت وقوم غيرها
والمفتاح اتكسر فى الباب قوم اتصرف بدل مانت قاعد كدة
وحاجه وقعت اتكسرت لاء مش كاس دى حاجه كبيرة وهتندم
والواد ابنك هيعيط
وامريكا هتضرب كوريا بالنووي وانت السبب
فإياك من تجاهلها فى الوقت دة حتى لو قالتلك مفيش وماليش ومتسالنيش ومتكلمنيش واى حاجه اخرها ييش
دول مجانين يابا

وانت برة كدة اعتبر انك قعدت ع القهوه وهاتلها حتة شيكولاته
ياعم ايوة زى ما سمعتها كدة اعمل اللى بقولك عليه ومتنحش الشيكولاته دى هتفرحها بس متاخدهاش ترميهالها وتقولها جبتلك شيكولاته اهو
لاء بالشكل دة روح وديها للحاجه
انا مش هفهمك بقى

ورغم اللى اتقال فوق هما مالهمش كتالوج فى اوقات كدة هتلاقيها طالبة نكد
والله لو انت ملاك قاعد بجناحاتك كدة ومعملتش حاجه ومكنتش ناوى تعمل حاجه حتى هتلاقيها جايه وقالبة وشها
اضحك ايوة زى ما بقولك اضحك
سامعك ياللى بتقول اضحك ليه - انا بقولك الحق افرحلك شوية علشان هيتنكد عليك
ومتسألش ليه وانا عملت ايه والكلام الفارغ دة لانه مش هيجدي ولا هيجيب نتيجة هما عندهم مود النكد دة حاجه عادية جدا فأتعود يا وحش
ومنهم اللى مش هتهدى ولا ترجع لطبيعتها غير لما تعيط فأستحمل بقى
وبالمناسبة كلهم بيتكلموا كتير دة الطبيعي ولازم تتكيف على كدة
ولو مراتك مبتتكلمش كتير ابعتها فورا للدكتور
الموضوع وما فيه ان الست بتتكلم يوميا 35 الف كلمة والراجل فى المتوسط 10 الالف
بيروح الشغل العشر تلاف يدوبك يكفوا تليفوناته والموظفين يرجع التانك فاضي
لكن هى مستنياه عندها 35 الف كلمة قول طلعت منهم 10تلاف مثلا مع نفسها شوية مع العيال وهكذا
مستنياك يا معلم ب25 هتاخدهم يعني هتاخدهم هتيجي تعمل ناصح وتنام
نام يا برنس نام هتصحي تروح الشغل وترجع هتلاقيهم بقوا 50 ال 25 بتوع امبارح وبتوع النهاردة

ولو اهملتها هتنفخك خناقات ونكد وهتخلص كل الكلام المتخزن من غير ما تسمعلك دة لو انت اتكلمت اصلا وفى الاخر هتختمها بالجمله الشهيرة الاهتمام مبينطلبش اصلا
امال لو بينطلب كنتى رفعتي عليه قضية اهتمام ولا ايه
لذلك هتلاقى جروبات البنات وقعدتهم اكتر من الشباب هما مبيسمعوش لبعض هما بيطلعوا الشحنه اللى موجودة كلهم بيتكلموا فى نفس الوقت
لو عندك ولد وبنت وبعتهم فرح مثلا
وسألتهم لما يرجعوا ايه اخبار الفرح ياولاد
-الولد : حلو .
=حلو ازاى يابني وضح
-حلو يابابا الحمد لله
ومتحاولش تاخد منه اكتر من كدة هو راح ضرب الحتة اللى عالحبل وراح مبسوط واكل وسلم على كام واحد ميعرفهمش وملا كرشه وروح
تعالى على البنت . ايه اخبار الفرح
- البنت : اسكتي يا ماما ( هى هتحكى لامها لانك مش هتسمعلها اصلا )
دى لابسة فستان ايه والميكب ايه وراسمة ايه وصاحباتها وقرايبها واصحاب العريس والحفله والمعازيم والبروجرام والشبكه والعريس شغال ايه وابوه ايه وامه مين
ومقولكمش عالطريق واللى حصل دة كان يوم وممكن يكملوا كلام ف الموضوع دة لبقية الاسبوع
فى حين ان الولد الموضوع معاه بسيط . حلو الحمد لله

انا ليه بقول ترويض الوحوش
لان الموضوع مش عافية ومش كتر فلوس
الست لو محبتكش ومفهمتهاش والله لو قلبتلها هندي بريش ما هتعجبها
لو جبتلها كل ورود الارض ما هتملى عينها
فى تكة كدة لو اتظبطت بقت خاتم ف صباعك
متظبطتش هتفضلوا ف تصادم وكل واحد عايش ف عالم لوحده
لكن في حاجه هتخليها تخضع برغبتها ولو خضعتلك خلاص انت كدة ملكتها
وانت سيد الرجاله والله لو انت عرة حتى
وانت انت ولا انتش داري
وعيوبك كلها بقت حسنات ومزايا
المشكلة ان الحاجه دى مبتتوصفش ومبتنطلبش ولا حتى بتتمثل
اه هى الزفت الحب

ومش هو الحب اللى هو ماشيين ويا بعض ووردتين ومقضينها
بصوا على اى اتنين اتجوزوا عن الحب من النوع دة معظم الجوازات دى فشلت وبقول معظمها مش كلها
الحب اللى بعد الجواز
ومقصدش بالجواز جواز الصالونات الاجباري
وانت مستعجل عاوز تتجوز وخلاص وهى لقت عريس وهوب
هو دة الزبون ودى الزبونة يلا يابني لولولولولى
ومبروك وضحكه صفرة علشان تبينوا انكم مبسوطين
وتصوروا كل حاجه علشان الناس تشوفكم مبسوطين وكدة
لاء مش دة
بتكلم عن الجواز اه التقليدي او لو حب قبل كدة حتى بس اللى لما تدخل تشوفها ينشرح قلبك وقلبها وتحس فيها بمودة وطيبة هى دى
الجواز مش عسل زى ما الناس فاكرة ومش زفت زي مالبعض بيبين
فيه كدة وكدة هتلاقى ايام سودة وايام تحلف بيها
وانت ف ايدك تختار دة ودة