طول ما احنا حاطين القديسين في موضوع المعجزات والأشياء اللي فوق عمل البشر بس عمرنا ما هانتقدم خطوه مع ربنا.. ولا هانعرف نتمثل بايمانهم... يعني بحس ان ابليس عاوز يعمي عنينا عن تعاليم حد زي البابا شنوده ويشغل الناس بكلام فاضي. ان البابا قاعد بيقرا ورق في مزاره.. ان البابا العربيه بتاعته ظهر فيها المسيح وكلام الفاضي اللي مابيحصلش ويعمي عنينا عن التعليم نفسه.. حد زي البابا كيرلس لو قولتلك اتعلمت منه ايه هاتقولي ( رجل صلاه).. ايوه عرفت كان بيصلي اذاي ؟ اتعلمنا منه ايه؟ يا تري لما البابا كيرلس بيوعظ كان بيقول ايه؟ لا مانعرفش حاجه.. احنا عرفناه من شويه كتب بردو معجزات مش عارفين مصدرها ايه. طب التعليم الايمان اتعلمنا ايه؟ معرفش....الحل في الجيل الصغير علموهم ايمان وتعليم القديسين دول ماتملوش عقلهم بحكاوي لا تودي ولا تجيب ماتملوش عقلهم في أعياد القديسين بمعجزات حصلت ومعجزات متفبركه مالهاش مصدر.. لكن احكيلهم عن ايمان القديسين عاشوا المسيح اذاي عرفوه اذاي حبوه اذاي.. ياريت نركز جدا فده مع ولادنا.. مانعيش الاولاد فيلم قديس لكن نعيشه حياه القديس...الكلام عن المعجزات مش هو الحياه الروحيه ده نقطه من بحر الحياه الروحيه.. بلاش ناخد نقطه واحده سببها اساس روحي ضخم احنا للاسف مش عارفينه..زي ماهانحكي معجزات لازم نقول تعليم.. الشفاعه مش بس معجزه الشفاعه في الحياه الروحيه..لما اقول يا انبا موسي قويني علي التوبه دي شفاعه لانه مثال للتوبه..الشفاعه مش بس معجزات.. كنيستنا اقوي من كده
