الموضوع مش حد يقولك "بحبك" وخلاص.. الموضوع مش شوية مشاعر عايز تطلعها والسلام.. الموضوع ببساطة أن في حد لما تبقى معاه بيطلع الاحسن اللي جواك.. بتكون معاه كويس .. هادي.. مبسوط.. حاسس بالامان.. عندك حتى طاقة تتحرك وتنجح في حياتك، وجود الشخص ده اساسي ومهم جداً في حياتك.. وجوده بيسند ويلحق اوقات يأس كتير.
وفي شخص تاني يمكن يكون قريب او بتحبه او في علاقة قوية بينكوا، بس ببساطة مع كل تعامُل هتلاقيه بيطلع الاسوأ اللي جواك .. كل خوف أو سلبية أو صغر نفس أو كراهية لنفسك حتى، والغريب انك ممكن تكون بتحبه أو وجوده ثابت في حياتك، مع ذلك هو مصدر الطاقة السلبية اللي في حياتك.
المعادلة مش أنت بتحب مين أو مين بيحبك. مش الفكرة في شكل او اسم العلاقة.. السؤال فعلاً.. مين بيطلع أحسن نُسخة منك في علاقتك بيه.. ؟! مين بيزُقك على الحياة، مين وجوده بيحببك في نفسك ويخليك تقبلها وتشوف الجمال اللي فيها اللي يمكن انت مش شايفه.. مين بتبقى معاه "انت" زي مانتا من غير تغيير وتكتشف انك جميل اوي في وجوده.. لو عندك الشخص ده "تبِّت" فيه.. ده نعمة من ربنا صدقني.
واقطع مع كل مُرسل طاقة سلبية في حياتك، ابعد عن كل اللي بيطلع فيك الاسوأ.
ابعد .. أنت تستاهل تشوف الاحسن اللي فيك، تستاهل تكون مرتاح وعلى طبيعتك في علاقتك باللي حواليك.. تستاهل تتشاف حلو ومحبوب .. تستاهل ماتشلش هَم الكلام أو التعامل مع اللي قدامك..
ابعد.. لأنك تستاهل تتحب زي ما أنت، بأخطائك.. بضعفك .. بفشلك.. بعُقدك وكلاكيعك.. تستاهل صدقني!
29 - 10 - 2017, 12:01 AM
العرض الشجري