اكبر مجموعة ايات من الكتاب المقدس مع التأملات

[sama smsma]

وقع عليه ليلمسه!!!



فَانْصَرَفَ يَسُوعُ مَعَ تَلاَمِيذِهِ إِلَى الْبَحْرِ، وَتَبِعَهُ جَمْعٌ كَثِيرٌ مِنَ الْجَلِيلِ وَمِنَ الْيَهُودِيَّةِ
8 وَمِنْ أُورُشَلِيمَ وَمِنْ أَدُومِيَّةَ وَمِنْ عَبْرِ الأُرْدُنِّ. وَالَّذِينَ حَوْلَ صُورَ وَصَيْدَاءَ، جَمْعٌ كَثِيرٌ، إِذْ سَمِعُوا كَمْ صَنَعَ أَتَوْا إِلَيْهِ.
9 فَقَالَ لِتَلاَمِيذِهِ أَنْ تُلاَزِمَهُ سَفِينَةٌ صَغِيرَةٌ لِسَبَبِ الْجَمْعِ، كَيْ لاَ يَزْحَمُوهُ،
10 لأَنَّهُ كَانَ قَدْ شَفَى كَثِيرِينَ، حَتَّى وَقَعَ عَلَيْهِ لِيَلْمِسَهُ كُلُّ مَنْ فِيهِ دَاءٌ.
11 وَالأَرْوَاحُ النَّجِسَةُ حِينَمَا نَظَرَتْهُ خَرَّتْ لَهُ وَصَرَخَتْ قَائِلَةً: «إِنَّكَ أَنْتَ ابْنُ اللهِ!».
12 وَأَوْصَاهُمْ كَثِيرًا أَنْ لاَ يُظْهِرُوهُ.


بعد صدام يسوع مع الفريسين و الكتبة و الهيروديسين انصرف.. مشي من وجه الشر.. مش خايف لانه واجههم و لكن حتي يتفرغ لخدمته.. ساعات الانصراف ساعة الشر مهم.. فيه اوقات كتير لو طرف انسحب في الوقت المناسب ممكن الامور تتحل.. زوج و زوجة في عراك و صراخ و بكاء.. اب و ابنه زعيق و خناق .. ام و ابنتها تراشق بكلمات و حكايات.. الحل... طرف ينسحب من لحظة الشر حيدي فرصة لاعادة الرؤية بدل من صدام و قرارات و عنف... المسالمة مش ضعف.. المسالمة منتهي القوة و المواجهة بالحق في هدؤ منتهي القوة..
المسيح خد مركب صغير.. حلوة دي... الكنيسة مركب صغير بس هو في داخلها... قلبك مركب صغير ممكن يدخل فيه.. ربنا مش عاوز سفينة تايتنك علشان يخش فيها.. هو بتاع الصغير و الغلبان اروح له و انا شوية خشب علي قدي و هو يبحر بيا
لأَنَّهُ كَانَ قَدْ شَفَى كَثِيرِينَ، حَتَّى وَقَعَ عَلَيْهِ لِيَلْمِسَهُ كُلُّ مَنْ فِيهِ دَاءٌ.
مالناش حل غيره.. اقع عليه يعني اترمي عليه من غير حسابات..زي طفل بيروح لابوه من غير حسابات لا همه هو لابس ايه و لا منعكش و لا حتي بلبوص ابوه يخش من الباب الواد يفط و يجري يترمي عليه و يبدا بقي يقوله بس رجلي اتعورت النهاردة و بص سنتي اتخلعت.. انا معملش الواجب.. ماما ضربتني.. و يترمي.. اترمي بكل وجعك و دائك و هو يمتلك من القوة رصيد ابدي للشاطر اللي بس ينتزعها... للي معاه الباسوورد بتاعتها.. دموعك تفك الشفرة و تغلبيه يقول حولي عيناك عني لانهما قد غلبتاني.. اترمي بايمان حقيقي انه يقدر.. وسط الغلاء و المر اللي شايفينه عجبتني عظة ا.رفعت بتاع مصر القديمة اللي ناس كتير شيرتها و قال فيها حول غلاء البنزين و الاسعار ان نتعلم ان نصلي حينما تمتد ايدينا لاي شيئ و نقول يابركة يسوع التي فاقت احتياجات الجموع!!! و ان نصدق انه يستطيع ان يعطي بركة حقيقية... كنت بفكر مراتي امبارح ازاي بيت امي ربنا يرحمها و بيت حمايا مليانين بركة.. كنت تخش تلاقي خير كتير و فيض و لحوم و فراخ و فاكهة و مخبوزات و حلويات و بكثرة.. و كانت امي تعقدني لما اطلع لها اول الشهر م.البيت تقولي خلوه معاكم انا لسه ما فتحتش الظرف بتاع الشهر اللي فات.!!!!. و انا كنت باخد تلات اضعافه و باجي اخر الشهر الف حوالين نفسي..
بالورقة و القلم ما فيش حلول.. الحل يركب السفينة و نرمي عليه.... خطية.. مشكلة.. معاناة.... مرض.. احتياج... لما نترمي عليه حناخد قوة... مش شرط قوة شفاء لكن ممكن قوة مساندة.. مش شرط جوزك ينصلح حاله لكن قوة توسع قلبك و تحتملي.. القصة اننا ناخد قوة..
اخر حاجة.. ليه المسيح رفض سجود و شهادة الشياطين.. لانه سجود خوف و ليس خضوع و شهادة رعب تفتقد للحب و التمتع بالعشرة.. و لن يقبل المسيح ان يشهد له احد خوفا او رعبا او رياءا بل لتكن شهادة حب و اختبار ذوقوا و انظروا ما اطيب الرب...
لالهنا المجد و الكرامة الي الابد


نبيل شحاتة