اخر الكل و خادم الكل

[sama smsma]

تنويعات علي اوتار انجيل مرقس
نغمة ٣٦
اخر الكل و خادم الكل



30 وَخَرَجُوا مِنْ هُنَاكَ وَاجْتَازُوا الْجَلِيلَ، وَلَمْ يُرِدْ أَنْ يَعْلَمَ أَحَدٌ،
31 لأَنَّهُ كَانَ يُعَلِّمُ تَلاَمِيذَهُ وَيَقُولُ لَهُمْ: «إِنَّ ابْنَ الإِنْسَانِ يُسَلَّمُ إِلَى أَيْدِي النَّاسِ فَيَقْتُلُونَهُ. وَبَعْدَ أَنْ يُقْتَلَ يَقُومُ فِي الْيَوْمِ الثَّالِثِ».
32 وَأَمَّا هُمْ فَلَمْ يَفْهَمُوا الْقَوْلَ، وَخَافُوا أَنْ يَسْأَلُوهُ.
33 وَجَاءَ إِلَى كَفْرِنَاحُومَ. وَإِذْ كَانَ فِي الْبَيْتِ سَأَلَهُمْ: «بِمَاذَا كُنْتُمْ تَتَكَالَمُونَ فِيمَا بَيْنَكُمْ فِي الطَّرِيقِ؟»
34 فَسَكَتُوا، لأَنَّهُمْ تَحَاجُّوا فِي الطَّرِيقِ بَعْضُهُمْ مَعَ بَعْضٍ فِي مَنْ هُوَ أَعْظَمُ.
35 فَجَلَسَ وَنَادَى الاثْنَيْ عَشَرَ وَقَالَ لَهُمْ: «إِذَا أَرَادَ أَحَدٌ أَنْ يَكُونَ أَوَّلاً فَيَكُونُ آخِرَ الْكُلِّ وَخَادِمًا لِلْكُلِّ».
36 فَأَخَذَ وَلَدًا وَأَقَامَهُ فِي وَسْطِهِمْ ثُمَّ احْتَضَنَهُ وَقَالَ لَهُمْ:
37 «مَنْ قَبِلَ وَاحِدًا مِنْ أَوْلاَدٍ مِثْلَ هذَا بِاسْمِي يَقْبَلُنِي، وَمَنْ قَبِلَنِي فَلَيْسَ يَقْبَلُنِي أَنَا بَلِ الَّذِي أَرْسَلَنِي».

كانت أحداث الصليب تقترب، علشان كده أكثر من مرة كان السيد يختلي بتلاميذه، ليؤكد لهم ضرورة تسليمه وقتله وقيامته.، هذه المرة ما فهموش وخافوا أن يسألوه ، ماهو مش ممكن للفكر البشري أن يتقبل قيام ملكوت الله على خشبة العار (الصليب)
و مين اللي يتصلب ؟! اللي بيعمل معجزات و يسكت البحر و يقيم الموتي ..اكيد صعبة !! خافوا يسالوه يمكن علشان المرة اللي انتهر فيها بطرس لما قاله حشاك انك تتصلب و قاله اذهب عني يا شيطان ..يمكن خافوا و هم بيدوروا علي مجدهم الشخصي اللي تدويرهم ده حيبان بعد شوية أنهم يبانوا قدام المسيح أنهم في جهل مش فاهمينه ..زي ساعات موظف يبقي واقف قدام صاحب الشركة و يطلب منه صاحب الشركة طلبات منها حاجات مش فاهمها ..يقوله فهمت المطلوب يقوله أيوة يافندم علشان يبان أنه كفاءة و يخرج يسأل السكرتيرة أو زميله هو الباشا كان يقصد اعمل ايه لما قال كذا و كذا ..
و هم ماشيين كل حلمهم أن المسيح ده ملكه ارضي و أنه بقه لما يملك حيخلي مين دراعه اليمين و مين وزيره و مين رئيس ...ربنا عرف اللي جواهم ..و ابتدأ يؤسس شروط الملكوت اللي افتكروه ميراث زمني و مجد ارضي
سألهم الاول بتتكلموا في ايه ..سكتوا مكسوفين لما حسوا في نبرته لوم ..كان عاوزهم يفتحوا الجرح القديم اللي بسببه اتجسد و اتصلب ..الكرامة و الذات ..و يديهم الدواء لعلاج هذا الجرح ..العلاج ..اخر الكل و خادم الكل ..اللي دخلني الكنيسة خادم بقي قسيس من فترة اسمه م.شيرين كان بيخدمني في ثانوي .ما دخلنيش بوعظ لكن بروح و خدمة و حب ..كنا في إسكندرية و أثناء الغدا لقيته بعد ما حط لينا كلنا الاكل بيدي اكله لواحد قال إنه لسه جعان و هو بيقوله خد ده زيادة بس انا كنت شايف أنه طبقه ..و برضه واد رزل عليا و دلق زيت علي قميصي و كان غالي بس انا بقلة ادب و تبجح رميت القميص في الزبالة علي أنه باظ ..صحيت٣ الفجر اشرب من المطبخ لقيته واخد قميصي من الزبالة و مسخن مية و بيغسله بايده بسافو و معلق علي الفول علشان يتدمس لفطارنا ..اخر الكل و خادم الكل ...ياللي بتصارع اخوك في الخدمة علشان انت تظهر ياللي بتاخدي الميكرفون قدامك و انتي في الكورال ...اخر الكل و خادم الكل ...ياللي بترجع البيت سي سيد و عاوز الكل يخدمك ..ياللي منشفة ريق العيال لوم و توبيخ علشان نسيوا يودوا اطباقهم المطبخ و لا نسي يجيبلك حاجة قولتي له عليها ...اخر الكل و خادم الكل ..ياللي بتجري تشترى هدومك الاول و تاخدي النصيب الأول من كل حاجة و مش مهم اخواتك ...اخر الكل و خادم الكل ..ياللي حطة تعبك فوق تعبه و بوز و تكشيرة و حضر الاكل لنفسك انا هلكت و كأنه كان مقضي اليوم في البيسين ..اخر الكل و خادم الكل ..ياللي بتغظيها و تقولها اعملي لي شاي و لو قالت مش قادرة اعمل انت ترد ليه بتعملي ايه طول النهار ..اعمل لنفسك و اعملها معاك ..اخر الكل و خادم الكل ..
لذيذ يسوع ده ..وقف ولد صغير في النص اكيد الولد اتخض وواقف قدام شنبات و دقون و العين عليه ..ماتفتهوش يسوع دي ..يحضنه و يطمنه و بعدين يكمل ...علمهم ازاي يقبلوا البشرية و الاخر ايا من كان كطفل يغسلوا له رجله و يقبلوه ...و كأنهم بالأب السماوي فعلوا ..خد بالك ساعات ناس بتفتكر من قبل واحدا يعني باسه بوسة ..لا لكنه يقصد قبله في الإيمان بالمسيح
Whosoever shall receive one of such children in my name,
يقصد تقبل اللي علي اده و الصغير ...سؤال سخيف لما واحد يسال واحد أول مرة تخدم ...؟! و ايه يعني ...الاجمل تقوله تعالي اخدم معانا ..
لالهنا المجد و الكرامة



نبيل شحاتة