الجواز مش صليب الجواز اكليل..

[Rena Jesus]

لما اتنين بيجوزوا وفجاءه تظهر مشاكل كتير وتبقى الحياه بتوصل للاستحاله فاجأه الكل بيقول( صليب وشيلناه) واتحول فجاءه الصليب لشئ مؤلم .
واتحول الجواز من اكليل لصليب تقيل..
رمينا اختيارتنا الغلط على كلمه صليب وربنا ادهولنا. لكن الحقيقه مش كده.

الحياه الزوجيه الصعبه مش صليب..
لكن اللى بيخلى الحياه الزوجيه توصل لمرحله صعبه هى قسوه القلب..
عدم احترام الاخر. الاهانه المستمره.. الكبرياء.. عدم التقدير..
واحد معاه فلوس كتير يفتكر انه اشترى مراته بالفلوس ..
واحد فقير يبداء يهين فى مراته ويضرب فى عياله بحجه اجيب منين..
اب يسيب عياله ولا يسأل فيهم علشان متخانق مع مراته وممكن يضيع فلوسه فى سجاير واكتر من كده..
اب يسمع كلام اهله فى خراب بيته..
زوجه مش قادره تستحمل ان جوزها على قده.. مطالبها فوق امكانياته..
زوجه بخيله فى مشاعرها.. زوج بخيل فى مشاعره..
وكل ده واكتر والولاد تبقى هى اللى هاتشيل حمل تقيل اوى فى الدنيا هما مش قده.

الجواز مش صليب الجواز اكليل.. لكن احنا اللى بنلوثه بحياتنا اللى فيها ذات وكبرياء..
ارجوك لو متخانق مع مراتك لو متخانقه مع جوزك. بصوا لولادكوا..
اتنازلوا علشان خاطر ولادكوا.. ارضوا بعض علشان خاطر ولادكوا..
عيش امين لمراتك.. وعيشى امينه لجوزك..
ياما بنقع فى حد يحن علينا غير شريك حياتنا بس ده فخ صعب صعب صعب هايضيع مش بس ولادك وحياتك لا ده هايضيع ابديه...
فلوسك مش هاتعمل بيت حلو لكن محبتك واحترامك لمراتك هاتعمل اجمل بيت ..
انك تنضفى البيت وتعملى اكل وتذاكرى لولادك ده شئ رائع بس مش هو ده اللى هايعمل بيت حلو لكن امومتك وصبرك واحتوائك لجوزك هو اللى هايعمل بيت حلو..

الجواز بيتحول لكلمه صليب علشان احنا اللى بنجلد روحنا وبنجرح روحنا بقسوه قلوبنا على بعضنا..
رجع اكليلك ورجعى اكليك ..
وماتحولوش حياتكم لصليب بس صليب مايدخلش السما..
الصليب اللى يدخل السما هو اللى من صنع ربنا ومن ايده والصليب اللى موافق عليه ربنا مش بيديه معاه زل واهانه لكن بيديه معاه احتمال وحب وسنده ..
ولسه فى امهات زى ام الغلابه.. ولسه فى اباء صابره على الدنيا وبتحضن عيالها