العلاقات الزوجية

[marit jesus]

قولنا لما نيجي نتعامل مع علاقتنا الزوجية سواء بنحسنها أو بنحاول ننقذها.
إننا بنوقف وقفة صريحة مع نفسنا، ونشوف إحنا عايزين فعلا نكمل ولا لا.
وقولنا طالما لسه بنسأل...هو ينفع نكمل ولا لا...؟
يبقى غالبا لسه فيه علاقة...بس عايزة شوية شغل.
وقولنا الخطوة الثانية: إننا نكتب أهدافنا من العلاقة دي...ونكتب تفاصيل...مش كلام عايم.
بلاش نقول السعادة ونسكت...
لكن نقول السعادة ونكتب تحتها مثلا: الخروجة الفلانية مرة كل أسبوع ولا اثنين.
نصيف في المكان العلاني...
الولاد يدخلوا مدرسة مش عارف إيه...
الأب يبطل أنتخة...ويتواجد معانا في الحفلات المدرسية...أو حفلة كل حفلتين مثلا...
الأم تبطل تبوز أكثر من مرتين في الساعة :D
وهكذا...كلام واضح وصريح...
طيب ليه بنكتب؟
أولا: الكتابة لها وظيفة مهمة...زي ما تكون ب:
"Download or copy your mind"
يعني تنزل كل الكراكيب والنحكشة اللي في دماغك على الورق.
وبالتالي هتلاقي الوش والحاجات اللي عمالة تزن وتخبط جواك...هديت شوية.
ثانيا: الكتابة بتخلي المشكلة اللي عاملة زي الخيوط المكعبلة جوه دماغنا، ومتشعبة في كل اتجاه...تتحدد ويتضح حجمها بالظبط لما تنزل على الورق.
ثالثا: الكتابة بتخلينا نرتب أفكارنا.
يعني ممكن تلاقي نفسك كتبت نقطتين شبه بعض...فتلغي واحدة...وتسيب الثانية.
كتبت نقطتين...فتلاقي واحدة أهم من الثانية...فترجع ترتبهم حسب الأولوية.
كمان الكتابة بتخليك تفكر في الكلام من وجهة نظر الطرف الثاني.
يعني مثلا لما نقول الأب يحضر الحفلات المدرسية:
هتلاقي نفسك بتفكر...طب ما هو الأب أساسا شغال في شركة صعبة...ومش بياخود أجازات...ده أصلا شغال في وظفتين علشان نعرف نعيش ؟!
الأب مثلا يجي يكتب ويقول الأم تبطل تبوز أكثر من مرتين في الساعة:
طب ما هي فعلا مضغوطة وشايلة البيت...والعيال مجننها...
دي هي كمان بتشتغل...ما هي شالت من القرف بتاع الخروج للشغل، والمواصلات، والمدير اللي يحرق الدم، والزميل أو الزميلة اللي بيضربوا أسافين علشان يوصلوا.
والطبخ والكنس والعيال.
أنا مش بحاول أكتب تفاصيل المشاكل...أنا بحاول أوري سيادتك تأثير الكتابة...وإزاي هتخلينا نفكر.
زي ما نكون بنسحب خيوط المشكلة من بعض...واحدة بواحدة.
رابعا: الناس اللي بتكتب كثير...زي ما أنا شغال على الصفحة كده...بتوصل لفترات بتعاني فيها من التصحر الفكري.
يعني شوية ومش هتلاقي حاجة تفكر فيها أساسا...والفترات دي بتبقى لذيذة، إنك تبعد وتقعد خالي الذهن شويتين.
يمكن أنت ما توصلش للمرحلة دي...من كتابة صفحتين ثلاثة...لكن على الأقل هتطلع شحنة كبيرة من اللي جواك عن طريق الكتابة.
- طيب إيه رأيك...أخود القائمة وأقدمها بقى للطرف الثاني علشان يحس على دمه؟
لا أبدا...مش في المرحلة دي خالص.
أنت بتكتب علشان أنت نفسك تفهم المشكلة بتاعتك فين؟
معظم المشاكل بتحصل، علشان أحنا مش عارفين هي إيه المشكلة أساسا !
وعمالين نطلب من الطرف الثاني يحلها لنا.
زي اللي عايز يهرش...وعمال يقول للطرف الثاني: أنزل تحت...لا تعالى يمين سِنة..يا أخي شمال شوية...
الطرف الثاني مش عارف مشكلتك إيه...؟
وأنت كمان مش عارف توصله لمكان المشكلة...علشان يساعدك تهرش الموضوع...قصدي علشان يساعدك على حلها :D
- يعني أحنا مش بنكتب علشان نخطط لحياتنا؟
لا، أحنا بنكتب علشان نفهم نفسنا...ونحاول نفهم إيه المشكلة.
- بس أنا مش بعرف أكتب، مش بعرف أعبر؟
ما أنا مش بقول لحضرتك مطلوب تبقى العقاد ولا الدكتور مصطفى محمود...المطلوب منك تكتب نقاط واضحة وبسيطة.
فأكتبوا يا جماعة وعبروا عن اللي جواكم على الورق.
وحاولوا تخلوه كلام له أبعاد...وواضح.