تأملات فى سفر التكوين الاصحاح الاول

[بنتك يايسوع]

تأملات فى سفر التكوين الاصحاح الاول

الايه الثانيه
وكانت الأرض خربة وخالية وعلى وجه الغمر ظلمة
الارض هي نفسي فقبل دخول الله حياتى وبدونه تصبح نفسي خربه مفهاش اى شئ صالح فالقلب غير نقي الودان ياما سمعت حاجات تزعل ربنا العنين ياما شافت حاجات مش كويسه لسانى ياما دان ف الناس كل حواسي خربه
وكمان خاليه من كل صلاحمفهاش اى حاجه عدله وكمان على وجه الغمر ظلمه واكيد بغياب الله ( النور الحقيقي الذى يضئ لكل انسان اتى الى العالم ) تصبح حياتي ضلمه وبطبيعه الضلمه اننا مش بنقدر نشوف اى حاجه قدامنا فوجودنا فى وسط الخطيه مش بيخلينا نشوف الله ولا الحاجات الحلوه اللى بيعملها عشانا ومش بنشوف اننا غلطانين ف حق ربنا لان الانسان ف الضلمه بيبقي زيه زي الاعمي بالظبط مش شايف غير عتمه بس


وروح الله يرف على وجه المياه
بس الغريب بقي انه رغم ان الارض خربه و خاليه وضلمه الا ان روح الله كان يرف على وجه المياه ايه ده يارب يعني انا لو حياتى كلها خطيه وعتمه ومفهاش اى شئ صالح روحك برضو هايفضل موجود جوايا ومش هايسيبني ايوة هايفضل موجود وده اكبر امل ف الدنيا ويخلينا عمرنا ما نيأس ولا نقول ان ربنا سايبنا

الايه التالته
وقال الله ليكن نور فكان نور
ربنا قالها صريحه ( انتم نور العالم ) ربنا خلقنا لنضئ فى عتمه العالم باعمالنا الحلوه اللى تمجده وكمان بمجرد ما الله قال ليكن نور فورا كان النور يعني مهما كانت حالتنا الروحيه مهما كانت درجه الخطيه اللى احنا ما بنعملها ربنا قادر ف لحظه يحولنا من عتمة الخطيه للنور يعني بمجرد ما بنعترف حياتنا بتبقي مليانه بنور المسيح ( لاننا ان اعترفنا بخطايانا فهو امين وعادل حتى يغفرها لنا )

الايه الرابعه
و فصل الله بين النور و الظلمه
طبيعي ان النور و الضلمه مينفعش يجمعهم مكان واحد لانهم عكس بعض طبيعي اولا ربنا لازم كيونوا مختلفين عن ابناء العالم و ربنا قال ( لا يستطيع احد ان يخدم سيدين اما الله او المال) مش شرط المال بس لا محدش يقدر يخدم ربنا و اى خطيه تانيه وفى مثل بلدي بنقوله صاحب البالين كداب يعني متحاولش تقنع نفسك انك هاتعيش مع ربنا بس ف نفس الوقت هعمل الخطيه الفلانيه اصلها صغيره ومش هتاثر ف علاقتى بربنا لا ربنا معندوش صغير وكبير اى خطيه قادره انها تفصلك عن الله تماما لو مقدمتش عنها توبه حقيقيه

الايات 26 و 27
و قال الله لنخلق الانسان على صورتنا كشبهنا
فخلق الله الانسان على صورته
ايه ده يارب ايه الرفعه العظيمه اللى انت رفعتها للانسان دي مين هو الانسان ده اللى تخليه على صورتك وشبهك
طيب من صفات الصورة انها بتكون طبق الاصل يعني اللى يشوف الصوره كأنه شاف الاصل طب هل احنا اللى بيشوفنا كأنه شاف الله ؟! هل عندنا الفضائل اللى الناس ما بمجرد ماتشوفها فينا تقول علينا فعلا اننا اولاد المسيح صورة الله دي كلها قداسه وطهاره وعفه و تواضع ومحبه و ........... يعني باختصار كل الفضائل الحلوه ( ويري الناس اعمالكم الحسنه فيمجدوا اباكم الذى فى السموات )
طيب عارفين ان الايه دي هاتكون سبب دينونه لينا اولا لما نقوله يارب معلش احنا مقدرناش نجاهد ف طريقنا الروحي اصلنا بشر ضعفاء طبيعتنا بتميل للخطيه وطبيعي ان الشيطان يتغلب علينا ساعتها ربنا هايرد و يقولك لا ياحبيبي انا خلقتك على صورتى وشبهي اديتك السلطان انك تدوس الحيات والعقارب اديتك سلطان على كل حاجه ف الارض (ان كان لكم ايمان مثل حبه الخردل تعملون الاعمال التى اعملها واكثر )

ثانيا لما الغير مسيحيين يشوفوا الايه دي ويشوفوا اعمالنا الوحشه هايقولوا مش هما دول اللى الههم قالهم انتم على صورتى وشبهي يعني هما بيعكسوا صورة المسيح وبكده هانشوه صورة المسيح باعمالنا ونكون سبب عثره لغيرنا

اذكروني فى صلواتكم

mrmr bent elbab